Өнөөдөр 9-р сарын 11-ний эмгэнэлт өдрийг дурсаж байна

Өнөөдөр АНУ-ын бүх нутаг дэвсгэрт 11 жилийн өмнөх есдүгээр сарын 11-ний халдлагыг дурссан эмгэнэлийн үйл ажиллагаа зохиогдож байна.

Нью-Йорк хотод  орон нутгийн цагаар 08.46 минутад  зарлах \ Олон улсын худалдааны цамхагийг алан хядагчдын онгоц мөргөсөн цагт\ нэг минутын чимээгүй агшнаар уг арга хэмжээ эхлэх аж.

Ихэр цамхагийн байсан газарт 2001 оны есдүгээр сарын 11-ний өдөр амь үрэгдсэн 2977 хүний нэрийг бичсэн дурсгалын цогцолбор байгуулагдсан билээ. Уламжлал ёсоор амь үрэгдэгсдийн ар гэрийнхэн нэрсийг унших явцад таван удаа нэг минутын чимээгүй хором болох юм.

ИТАР-ТАСС мэдээлснээр, энэ жил анх удаа эмгэнэлийн ёслолын арга хэмжээнд улс төрийн зүтгэлтнүүд илтгэл тавихгүй юм байна.

Нью-Йоркийн бүх сүмүүдэд амь үрэгдэгсдийн гэгээн дурсгалыг хүндэтгэх арга хэмжээ зохиогдоно.

Д.Мигаа