Pussy Riot-д энхтайвны шагнал хүртээнэ

Жон Ленноны бэлэвсэн гэргий Йоко Оно Оросын панк хамтлаг Pussy Riot-ын гишүүдэд “Леннон-Оно” хэмээх энхтайвны шагнал гардуулах хүсэлтэй байгаагаа мэдэгдсэн байна.

Энэхүү шагналыг Нью-Йорк хотод зохиогдох ёслолын үйл ажиллагааны үеэр олгох ба энэ тухай олон улсын Аmnesty International хүний эрхийг хамгаалах байгууллагаас мэдээлэл хийжээ.

Шагналын эзэд одоогоор шоронд хоригдож байгаа тул тэднийг төлөөлөн Надежда Толоконниковагийн нөхөр Петр Верзилов очиж шагналыг авах аж.

Өмнө нь энэхүү шагналыг 2003 онд Газын Зурваст израилийн бульдозерт дарагдан амь үрэгдсэн америкийн идэвхтэн бүсгүй Рейчел Кори, америкийн эдийн засагч Жон Перкинс, америкийн сэтгүүлч, талийгаач Кристофер Хитченс, мөн нэрийг нь нууцалж буй нэгэн “чухал бус” идэвхтэн нар авч байжээ.

Наймдугаар сарын 17-нд Мария Алехина, Надежда Толоконникова, Екатерина Самуцевич нар 2 жил жирийн дэглэмтэй хорих ангид ял эдлэхээр шийтгэгдсэн билээ.

Өмнө нь Pussy Riot-ыг Стинг, RHCP-ийн хөгжимчид, Патти Смит, Денни де Вито, Мадонна, Пол Маккартни нар дэмжиж байсан аж.

Д.Мигаа