Шүхэрчин бүсгүй нас барлаа

Өнөө өглөө Москвагийн Бурденкогийн нэрэмжит эмнэлэгт дэлхийн ба Европын аварга шүхэрчин Ирина Синицына таалал төгслөө. Тэрээр есдүгээр сарын 23-ны өдөр АНУ-ын Калифорни мужид болсон тэмцээнд скайдайвингийн дэлхийн шинэ рекорд тогтоох оролдлого хийж байхдаа хүндээр гэмтсэн аж.

Группээр шүхрийн харайлт хийх үед Ирина агаарт өөр нэг тамирчинтай мөргөлдөн, шүхрийн оосроо хугацаанд нь татаж чадаагүйгээс нөөц шүхэр нь дэлгэгдэлгүй унаж хүзүүний хэдэн яс нь хугарчээ.

Баасан гаригт тамирчныг АНУ-аас Москвад авчран эмч нар боломжтой бүх эмчилгээг хийсэн боловч гэмтэл нь хэт хүнд байсны улмаас амийг нь аварч чадаагүй байна.

Д.Мигаа