Леди Гага Орост тоглоно

Оросын хойд зүгийн нийслэл поп-дива Леди Гагагийн концертын бэлтгэл ажлыг хангаж байна.

Өөрийн шийдэмгий санаачлагуудаараа алдартай Питерийн депутат Виталий Милонов бүх зүйлийг анхааралтай ажиглах болно хэмээн урьдчилан сануулсан байна.

Тэрээр Леди Гагагийн концертонд насанд хүрээгүй хүүхдүүдийг оруулахгүй байхыг уриалан, тоглолтыг зохион байгуулагчдад албан ёсоор анхааруулжээ. Зохион байгуулагчдын зүгээс шоу хүүхдийг хортой мэдээллээс хамгаалах тухай шинэ хуулийн хүрээнд явагдах болно хэмээн мэдэгдсэн аж.

Поп-дивагийн концертыг сурталчилж буй зарлалын самбарууд дээр “12+” гэсэн тэмдэглэгээ аль хэдийн тавигдсан байна. Гэвч үзэгчдийн бичиг баримтыг шалгах эрх зөвхөн цагдаагийнханд л байдаг тул тэр бүр бүрэн дүүрэн хэрэгжүүлэхэд асуудалтай байж болох юм.

Леди Гага дэлхийг тойрох аялан тоглолтын хүрээнд Орост арванхоёрдугаар сард ирэх аж. Тэрээр The Born This Way хэмээх шинэ цомгоо Москвагийн “Олимпийский”, Санкт-Петербургийн “Петербургский” цэнгэлдэх хүрээлэнд танилцуулах юм байна.

Д.Мигаа