УИХ-ын гишүүдийн золголтын тухай 20 коммент

1. Жил бүр төрийн түшээд золголтоо сэтгүүлчдэд нээлттэй хийдэг. Харин энэ жил сэтгүүлчдэд хаалттай буюу Их тэнгэрт шинийн нэгэнд “нууцаар” золгов.
2. Ерөнхийлөгч УИХ-ын гишүүдтэй 13:00 цагт, УИХ-ын дарга 14:00 цагт, Ерөнхий сайд 15:00 цагт гишүдийг хүлээн авч төрийн золголт “үйлдэв”.
3. Ингэхдээ тэд гишүүдэд урилга тараасан байх юм.
4. МАН-ын гишүүд  шинийн гуравны өглөө 10:00 цагт Тусгаар тогтнолын ордонд “даруухан” золголоо.
5. Харин АН-ынхан олон нийтэд зарлан тунхаглаж байгаад  ҮЗХ-ны гишүүдийнхээ золголтыг “Элит” төвд хийсэн. Золголтод УИХ-ыг төлөөлж З.Энхболд, Д.Эрдэнэбат, Засгийн газрыг төлөөлж Н.Алтанхуяг нар байлцав.
6. Тэд Шинийн нэгэнд өмссөн өнөөх л дээл, малгайгаа өмссөн байлаа. УИХ-ын бусад гишүүн энэ золголтод нэг ч байсангүй. Хурган дарга нараар дүүрэн байлаа.
7. УИХ дахь АН-ын бүлгийн дарга Д.Эрдэнэбат байнга “гоонж” өмсдөг ч энэ өдөр дээл өмссөн нь түүнд тун сайхан зохисон байв.
8. МАХН-МҮАН-ын гишүүд дэмжигчид МАХН-ын төв байранд золтголтоо хийв.  Бусад золголтыг бодвол замбараагүй болсон.
9. Тус эвслээс сонгогдсон гишүүд бүгд дээлээр гангарсан байлаа.  

10.  Золголтод хэрвээ УИХ-ын гишүүн Г.Уянга оролцсон бол З.Баянсэлэнгэ гишүүнтэй улаан дээлээр ижилсэх байлаа.  

11.  Харин эрэгтэй гишүүдийн хувьд нүнжигтэй загнаж үнэтэй хөөрөг зөрүүлж байлаа.  

12.  Эрэгтэй гишүүдээс хамгийн царай дарсан дээл өмссөн нь Н.Батцэрэг, Д.Тэрбишдагва гишүүд байлаа. Уг нь тэдэнд дээл сайхан зохидог ч энэ удаад дээлийн өнгөө буруу сонгожээ.

13.  Харин хамгийн сайхан нь харагдаж байсан нь Д.Батцогт гишүүн байлаа.  Түүнд дээл нь зохисон гэж ванлий.

14.  Дээл өмсөж харагдаггүй О.Баасанхүү гишүүн энэ өдөр ногоон дээлээр гангарсан ч “Хатагтай” эмнэлгийн ерөнхий эмч А.Отгонболдтой санаандгүй байдлаар ижилсэв.

15.  УИХ-ын эмэгтэй гишүүдээс энэ жил хамгийн ганган байсан нь Г.Уянга гишүүн байсан бол Р.Бурмаа гишүүн  хамгийн өвөрмөц хийц бүхий үндэсний хувцасаар гангарсан юм.

16.  Хамгийн "эротик" дээлтэй нь С.Одонтуяа гишүүн байлаа. Тэрбээр ханцуй нь гэрэлтсэн хар өнгийн дээл өмссөн байлаа.

17.  Хамгийн “сонин дээл” өмссөн нь Д.Арвин болон Л.Сарангэрэл гишүүд байлаа. Тэд урт, чөлөөтэй үндэсний хувцас өмссөн ч “салбайсан” харагдав.

18.  Д.Арвин гишүүний хувьд сар шинийн өмнө шар, цоохор хоёр дээлээр гангарч бэл бэнчинтэйгээ "гайхуулсан".

19.  МАН-ын дарга Ө.Энхтүвшин дээлийнхээ эмжээрийг малгайтайгаа хослуулсан нь дэгжин харагдаж байлаа. Тэр бүх цаг үед донжтой хувцасладагаараа “зартай”.

20.  Бие даагч гишүүдээс С.Ганбаатар дэгжин байлаа. Тэрбээр “улайчихаад”  л хүннү дээл, туслахтайгаа ижил лоовууз малгайг тэргүүндээ залсан байв.