Монголын “Итгэлт баян”-гууд одоо л улсдаа хандив өргөх цаг

Гавьяат эдийн засагч Б.Осоргаравын өчигдөр санаачилж эхлүүлсэн хандивын аян өнөөдрөөс хүчээ аван дэмжигдэж эхэллээ. Эх орноо эдийн засгийн хүндрэлтэй байхад “ачаа үүрэлцэхээр” шийдсэн ахмад эдийн засагч хувиасаа 10 сая төгрөг, алтан бөгж, арван агт адуу хандивлан, хоёр сарын туршид эх оронч хандивын аян өрнүүлэхийг ард түмэнд уриалсан билээ. Түүний тооцоолсноор, хүн бүр 1000-100 сая төгрөг улс эх орондоо хандивлавал 640 тэрбум төгрөг “Эх орныхоо төлөө” санд төвлөрөх юм байна. Мөн Монгол улсад үйл ажиллагаа эрхлэн явуулдаг аж ахуйн нэгжүүдээс 2-2,5 сая төгрөгийн хандив хүсч буйгаа өгүүлсэн юм.

Тэгвэл өнөөдөр УИХ-ын гишүүн Б.Дэлгэрсайхан 100 сая, “Моннис” групп 100 сая, “Ажнай” Д.Бат-Эрдэнэ 30 сая төгрөгийг тус тус эх орондоо хандивлахаар болсноо мэдэгдсэн байна.  Хандивын хөдөлгөөнийг манлайлан түүчээлсэн тэдний араас хэн хэн гэгч эрхмүүд дараалан орж ирэхийг олон нийт сонирхон ажиглаж байгаа бололтой. Нөгөө өөрсдийгөө эх оронч хэмээн зарлаж, цээжээ дэлдээд байдаг нөхдүүд яг цаг нь тулаад ирэхээр хэрхэн, яаж хандахыг хүмүүс сонирхон хүлээсээр байна. Үг бус, үйлдэл хамгийн чухал!

Монголын банкуудын нийт хадгаламжийн бараг 80-90% нь цөөн тооны хэдхэн баячуудын дансанд байдгийг нийтээрээ мэднэ. Тэдгээр хэмжээлшгүй их хөрөнгөтэй томчууд яг энэ эгзэгтэй цаг мөчид улс орондоо томхон тусалчихвал ядаж л үр ач нар нь цагаан хэл амнаас холуур явах юм даа. Гэвч тэдний чин сэтгэлийн чиг хандлага, хүний мөс чанар л мэдэх хэрэг. Уг нь олохын хэрээр тодорхой хэмжээгээр гаргаж байвал алс нигуурдаа өлзий буянтай гэлцдэг юм билээ.

Хандивын аяны талаар олон нийтийн хандлага янз бүр байх шиг харагдана. Ихэнх нь дэмжиж буй өнгө аястай, харин зарим нь олигархуудын “идээд цусалцан” мөнгийг бид яахаараа цуглуулах ёстой гэж хэмээн хандаж байх шиг.

Ямартай ч, манай улс ирэх гуравдугаар сард Хөгжлийн банкны бондын зээлийн хүү болох 580 сая ам.долларыг төлөх ёстой. Тэгвэл энэхүү төлбөрт бага ч атугай нэмэр болохуйц хандивыг хувь хүн, албан байгууллагууд санал санаачлага гарган цуглуулж гэмээнэ бид эдийн засгийн хүндрэлээс аль болох түргэн хугацаанд гарах боломжтой юм.

Иргэн бүр нь эх оронч санаачлага гарган хандив цуглуулж улс орноо хямралаас гаргасан арвин туршлагыг БНСУ, Грек зэрэг улсуудаас харж болно. Ийм онцгой цаг үед хэн нэгэн рүү буруу чихээд, бүгдээрээ гараа хумхиад хараад суумааргүй л байна. Бид л түрүүлж хөдлөхгүй юм бол хэн Монголыг хөгжүүлж өгөх билээ!... 

Д.Мигаа