”МАНАН дэглэмийн эсрэг Монгол түмний нэгдэл” 1990 оноос хойшхи анхны том жагсаал болно

УИХ-ын нэр бүхий 40 гишүүн УИХ-ын дарга М.Энхболдыг ёс зүйн хариуцлага хүлээж, үүрэгт ажлаа өгөхийг шаардаад буй. Гэвч сар гаруйн хугацаанд ямар нэг шийдэл гаргалгүй, төрийн ажлыг гацааж буй учир УИХ-ын гишүүн Л.Оюун-Эрдэнэ, Т.Аюурсайхан, Ж.Батзандан, Л.Болд, Х.Нямбаатар нар өчигдөр хэвлэлийн бага хурал зарлаж, УИХ-ын дарга М.Энхболдыг 48 цагийн дотор огцрохыг өчигдөр шаардсан юм. Хэрэв УИХ-ын дарга 2018.12.27-ны пүрэв гараг буюу маргааш 11:00 цаг гэхэд огцрох өргөдлөө өгөхгүй бол "МАНАН дэглэмийн эсрэг Монгол түмний нэгдэл" эсэргүүцлийн жагсаалыг Төв талбайд зохион байгуулахаа мэдэгдсэн.

УИХ-ын гишүүн Т.Аюурсайхан “МАНАН хэмээх нам дамнасан бүлэглэлийг эсэргүүцэн “МАНАН-гийн эсрэг монгол түмний нэгдэл"-ийг үүсгэн байгуулж, УИХ-ын дарга М.Энхболдыг үүрэгт ажлаасаа чөлөөлөгдөхийг шаардаж байна. Хэрэв хүлээж авахгүй бол эсэргүүцлийн тэмцлийг Монгол орон даяар зохион байгуулна. Жагсаалыг 100 орчим ТББ илэрхийлж, гарын үсгээ зураад байна” гэж байв.

УИХ-ын гишүүн Л.Болд “МАНАН бүлэглэлийн хамгийн дээд албан тушаалд байгаа, Монголын төрийг барьцаалж байгаа М.Энхболдыг УИХ-ын даргаас огцруулах шаардлагыг өгч байна. Ардчиллын дутагдлыг ашиглаж, 20 гаруй жилийн хугацаанд МАНАН-гийн дэглэм тогтоож, ард түмний өмч хөрөнгийг эрхшээлдээ оруулж, монгол төрийг барьцаанд оруулсан нөхцөл байдал үүссэн. МАНАН бол гадны түрэмгийлэгчид, дээрэмчид, Монголын төрийг барьцаалагчид. Үүний эсрэг монгол хүн бүр тэмцэх ёстой. 1990 онд байгуулсан ардчиллынхаа зарчимд нийцүүлэн тэмцэхийг уриалж байна. Энэ бол Монголын ард түмэн эх орондоо эзэн суух хувьсгал байх болно. Энэ бол та бидний ялалт байх болно” гэсэн юм.

Харин УИХ-ын гишүүн Ж.Батзандан маргааш болох жагсаал нь тайван жагсаал болохыг сануулаад, үймээн самуун болгох зорилготой МАНАН бүлэглэлийн хатгаасанд автахгүй байхыг иргэдээс хүссэн юм. Тэрбээр мөн “Бидний хувьд өнөөдөр МАНАН бүлэглэлийн боол нь байх уу, эх орондоо эзэн нь байх уу гэдэг сонголт ирээд байна. Өнөөдөр УИХ-ын гишүүд нам харгалзахгүйгээр нэгдэн тэмцэж байгаа. Энэ тэмцэл бол хувьсгалт тэмцэл юм. Эх орноо аврах тэмцэл. МАНАН бүлэглэл Монголыг тонон дээрэмдэж байхад эх орончид нам харгалзахгүйгээр нэгдэж байна. Энэ жагсаал бол Монголын эх орончдын жагсаал юм. Монголын эх орончдыг жагсаалд уриалж байна. МАНАН дэглэмийн эсрэг монголчууд олуулаа гэдгийг харуулъя” гэж байв.

УИХ-ын гишүүн Х.Нямбаатар “Үндсэн хуулийн 1.6-д Монгол төр ардчилсан ёс, шударга ёс, хүний эрх чөлөө, тэгш байдал, үндэсний эв нэгдлийг хангах, хууль дээдлэх гэсэн зургаан зарчмыг баримтлах ёстой гэж заасан. Өнөөдөр энэ зарчмууд зөрчигдөж байгаа нь үнэн. УИХ-ыг 76 тойрогт хувааж, бүгд ард түмнийг төлөөлөх эрхийг Үндсэн хуулиар олгосон. Тэгэхээр 40 хүний саналын эрх нэг хүний саналын эрхийг давахгүй байна. Нэг хүний суудлын үнэ цэнэтэй хууль тогтоох дээд байгууллага дэлхийн хаана ч байхгүй” гэсэн.

УИХ-ын гишүүн Л.Оюун-Эрдэнэ “М.Энхболд 60 тэрбумын асуудал ярьсан бичлэгт байсан гэдэг нь л өөрөө энэ хүн огцроход хангалттай үндэслэл болно. Бид энэ удаад үгүй гэж хэлэхгүй бол энэ систем улам хүчирхэгжинэ. Тийм учраас бид тэмцлийн бүх хэлбэрийг шат дараалан авч ирсэн. Харин өнөөдөр ард түмэндээ хандаж байна. Энэ удаагийн тэмцэл бол хоол идэнгээ шүүмжлэх тэмцэл биш. Энэ бол сошлд сэтгэгдэл бичих тэмцэл биш. Бид шинэ нийгэм рүү явах ёстой. Эрх чөлөөгөө эдлэх ёстой. Цаашдаа аль нэг авлигын хэрэгт орооцолдсон хүн албан тушаалтайгаа зууралдаж болохгүй гэдгийг ойлгуулах ёстой. Ингэж байж сайн засаглал руу явна. Ингэж байж бид даварсан авлигачдад үгүй гэж хэлдэг болно. Бид бууж өгч болохгүй. Бид өрөвдөж болохгүй. Бид шантарч болохгүй” гэж байв. Тэрбээр мөн маргааш болох жагсаал 1990 оноос хойшхи анхны том жагсаал, тэмцэл байна гэдгийг онцолж байгаа юм. 

УИХ-ын дарга М.Энхболдыг албан тушаалаасаа өөрийн хүсэлтээр огцрох нь зүйтэй гэсэн шаардлагад нэгдэж буйгаа Иргэний хөдөлгөөн, Төрийн бус байгууллагуудын төлөөллүүд мөн мэдэгдээд байгаа юм.

УИХ-ын гишүүн Л.Оюун-Эрдэнэ, Т.Аюурсайхан, Ж.Батзандан, Л.Болд, Х.Нямбаатар нар маргааш болох бүх нийтийн жагсаал, цуглааны аюулгүй байдлыг хангуулах асуудлаар яг одоо ТЕГ, ЦЕГ-ын удирдлагуудтай Төрийн ордонд зөвлөлдөж байна.

Н.Туяа