УИХ хуралдах уу, эс хуралдах уу?

УИХ-ын чуулганы нэгдсэн хуралдааны ирц өнөөдөр дахиад л бүрдэхгүй бололтой! Хэрэв ирц бүрдэж гэмээнэ арав гаруй удаа тасалдаад байсан УИХ-ын чуулганы нэгдсэн хуралдаан хуралдах боломжтой болно. Чуулганы нэгдсэн хуралдаанаар хэлэлцэх учиртай цаг үеийн нэн тулгамдсан 20 гаруй асуудал хүлээгдэж байгаа.  Миний мэдэхийн л эдгээр асуудлууд УИХ-ын чуулганы нэгдсэн хуралдаан хуралддаг пүрэв, баасан гараг бүр хэлэлцэх асуудлуудын дараалалд бичигдсээр хоёр сар шахам бүр хоёр он дамнан үргэлжилж байна. УИХ-ын гишүүн Л.Оюун-Эрдэнэ, Ж.Батзандан, Л.Болд, Х.Нямбаатар, Т.Аюурсайхан нар УИХ-ын дарга М.Энхболдыг огцрохоос нааш чуулганы хуралдаанд суухгүй гэж 2018.11.22-нд мэдэгдсэнээс хойш лав чуулган хуралдаж чадалгүй шинэ онтой золгов.

Өнөөдрийн хувьд УИХ-ын чуулганы 2019 оны анхны нэгдсэн хуралдааныг 10.00 цагаас зарлаад байгаа. Хэлэлцэх асуудлын дарааллын эхэнд Монгол Улсын Засгийн газрын гишүүн-Хүнс, хөдөө аж ахуй, хөнгөн үйлдвэрийн сайдыг томилох тухай асуудал болон Монгол Улсын Засгийн газрын гишүүн-Боловсрол, соёл, шинжлэх ухаан, спортын сайдыг огцруулах тухай асуудлыг тавьсан байна. Үнэхээр Монгол Улсын хоёр гол салбар удирдлагагүйгээр хоёр сар шахам болж байгаа. Өвлийн оргил хүйтний үед бид хөдөө аж ахуйн сайдгүй байгаа бол сурагчдын уртын амралтын үед онлайнаар хичээл заах асуудлыг батлах боловсролын сайдгүй л явна. Ийм чухал цаг үед чуулганы ирц бүрдэхгүй, УИХ-ын үйл ажиллагаа гацаад байгаа юм.

Мөн Засгийн газраас 2018.11.21-ний өдөр өргөн мэдүүлсэн Ашигт малтмалын тухай хуульд нэмэлт, өөрчлөлт оруулах тухай хуулийн төсөл хэлэлцэх асуудлын дээгүүрт бичигдэж буй. УИХ-ын гишүүн Б.Пүрэвдоржийн тайлбарласнаар Ашигт малтмалын тухай хуулийг нэн даруй өөрчлөхгүй бол алт “0” хувийн татвартай болж, алтны компаниуд хуулийн дагуу татвараас зугтах боломж бүрдэн алтнаас авдаг татвараас Монгол Улс 50 тэрбум төгрөгийн алдагдал хүлээх нөхцөл бүрдээд байгаа гэсэн.

Түүнчлэн Монгол Улсын Ерөнхийлөгчийн зүгээс үндэсний аюулгүй байдалд заналхийлж буй агаарын бохирдлын асуудлаар хаалттай мэдээлэл хийх, Монгол Улсын Ерөнхий сайдын Мал аж ахуйн салбарыг хөгжүүлэх талаар төрөөс баримталж буй бодлогын хэрэгжилт, бэлчээр ашиглалтын талаар нээлттэй мэдээлэл хийх зэрэг асуудал чуулган болгоны хэлэлцэх асуудлын дараалалд байсаар удав. Ийм л тулгамдсан асуудлуудыг хэлэлцэх шаардлагатай байхад УИХ хуралдаж чадахгүй байна.

Шалтгаан нь өнөөх л сандал суудлын маргаан. Ард түмний хүсэл сонирхлоос давсан албан тушаалын ашиг сонирхол. УИХ-ын гишүүдийн дийлэнх олонх буюу 40 нь одоогийн УИХ-ын даргаар удирдуулах боломжгүй тул М.Энхболдыг албан тушаалаасаа огцортол чуулганы үйл ажиллагаанд оролцохгүй гэдгээ мэдсэн. Үүнийг нь иргэний хөдөлгөөнүүд, ард түмэн дэмжиж идэр есийн хүйтэнд 30 мянгуулаа төв талбай дээр жагсаж эсэргүүцлээ илэрхийлсэн. Жагсагчид УИХ-ын даргыг 72 цагийн дотор огцрохыг шаардсан бичгээ өгөх гэтэл М.Энхболд “олдоогүй” юм даг. УИХ-ын гишүүд болон ард түмэн төрийн өндөр албан тушаалыг худалдах тухай 60 тэрбум төгрөгийн хэрэгт нэр холбогдсон явдал нь УИХ-ын даргын огцрох үндэслэл болно хэмээн үзэж, үүнийгээ ч шаардаж буй. Харин УИХ-ын дарга “гүрийсээр” байгаа. Монгол Улсын Ерөнхий сайд, МАН-ын дарга У.Хүрэлсүхийн хувьд М.Энхболдыг хамтдаа албан тушаалаа өгье гэж хэлж үзсэн удаатай.

УИХ-ын гишүүдийн хувьд дарга нар л хоорондоо учраа олчихвол хуралдаандаа сууж, төрийн үйл хэргийг тасралтгүй үргэлжлүүлэх хүсэлтэй байгаа юм билээ. Энэ талаар Байгаль орчин, хүнс, хөдөө аж ахуйн байнгын хорооны дарга Л.Элдэв-Очир хэлэхдээ “Гишүүд хуралдаа суухгүй байгаа шалтгаан нь УИХ-ын үйл ажиллагаанд оролцохгүй гэж мэдэгдсэн УИХ-ын 40 гишүүний шаардлагатай холбоотой. Байдал үнэхээр төвөгтэй байна. УИХ-ын гишүүд хуралдаа суухад бэлэн байгаа. Дарга нар ойлголцсоноор асуудал шийдэгдэх байх” гэсэн. Тэгэхээр төрийн үйл хэргийг үргэлжлүүлэхийн төлөө, түмний хүсэл сонирхлыг биелүүлэхийн төлөө УИХ-ын гишүүд чуулганы хуралдааныг хуралдуулахад бэлэн байгаа юм байна. Харин төрийн гацааг арилгах гол хүн болох М.Энхболд парламентын даргын суудлаа өгөх талаар огт бодохгүй л байгаа юм даа.

М.БҮҮВЭЙ

WWW.ZINDAA.MN