ЭРҮҮДЭН ШҮҮСЭН 27 минут 8 секундын БИЧЛЭГ

-Ямартай ч эрүүдэн шүүж байгаа 27 минут 8 секундын бичлэгийг хэвлэлийнхэнд үзүүллээ. Харин бичлэгээс Б.Содномдаржаа, Т.Чимгээ нарт хүч хэрэглэж, ял тулгасан гэх ганцхан зүйл л уншигдана-

Төр, нийгмийн нэрт зүтгэлтэн С.Зориг агсныг хөнөөсөн хэргээр гурван шатны шүүхээс Ц.Амгаланбаатар, Б.Содномдаржаа, Т.Чимгээ нарт ялын дээд хэмжээг оноосон билээ. Тэгвэл Б.Содномдаржаа, Т.Чимгээ хоёрыг эрүүдэн шүүж, ял тулгасан болох нь ил боллоо. Өөрөөр хэлбэл, тэднийг Төв аймаг дахь хорих ангийн хонгилд тусгайлан бэлдсэн өрөөнд бүтэн 476 өдөр эрүүдэн шүүж, тамласан үйл явц бичлэгт үлджээ. Харин Засгийн газрын шийдвэрээр ялтан Б.Содномдаржаа, Т.Чимгээ нарыг эрүүдэн шүүж байгаа бичлэгийн тодорхой хэсгийг нууцын зэрэглэлээс гаргаж, зөвхөн зургаахан өдрийн бичлэгийн нэгээхэн хэсгийг өнөөдөр /2019.03.29/ хэвлэл мэдээллийнхэнд үзүүллээ.  

-ЭРҮҮДЭН ШҮҮЖ БАЙГАА БИЧЛЭГ 27 МИНУТ 8 СЕКУНД ҮРГЭЛЖИЛНЭ-

Хэвлэлийнхэнд үзүүлсэн ялтан Б.Содномдаржаа, Т.Чимгээ нарыг эрүүдэн шүүж байгаа бичлэг 27 минут 8 секунд л үргэлжилнэ. Түүнээс бусад бичлэгийг прокурорын байгууллагаас олон нийтэд үзүүлэхийг хориглож Тагнуулын ерөнхий газарт бичиг хүргүүлжээ. Тиймээс зөвхөн хуулийн хүрээнд зөвшөөрөгдсөн бичлэгийн хэсгийг л хэвлэл мэдээллийнхэнд үзүүлсэн юм. Ингэхдээ бичлэгийг үзүүлэх өрөөнд камер, зургийн аппарат, диктофон, гар утас зэргээс эхлүүлээд тэмдэглэлийн дэвтэр, бал хүртэл авч орохыг хориглосон билээ.  

Тэрхүү бичлэгийн 25 минут орчим нь Б.Содномдаржааг эрүүдэн шүүж, тамлан зовоож байгаа нь гарах бол үлдсэн минутад нь Т.Чимгээг айлган сүрдүүлж, хэргээ хүлээхийг шаардаж байгаа хэсэг гардаг.

Бичлэгийг Төв аймаг дахь хорих ангийн ашиглалтаас гарсан доод давхрын хонгилд өнгөрсөн 2015 оны есдүгээр сард хийсэн гэдэг нь тодорхой харагдаж байлаа. Өөрөөр хэлбэл, дүрс бичлэгт гарч байгаагаар бол Б.Содномдаржааг 2015 оны есдүгээр сарын 1-6-ны хооронд буюу бүтэн зургаан өдөр тамлан зовоож, эрүүдэн шүүж байгаа дүр зураг гардаг.  Харин Т.Чимгээг тухайн оны есдүгээр сарын 08-09-нд шилжих шөнө ойролцоогоор 40 орчим минут дарамталж, хэргээ хүлээхийг тулгаж байгаа нь дүрс бичлэгт үлджээ. 

Б.СОДНОМДАРЖАА: ЧИ ТАВАН НАСТАЙ БАЙХДАА АХАА ГЭЭД ХӨТЛҮҮЛЭЭД ЯВДАГ БАЙСАН БИЗ ДЭЭ

Ялтан Б.Содномдаржаагийн хоригдож байгаа өрөө нь ямар ч цонх, агааржуулагчгүй. Тэр ч битгий хэл, бие засах газар ч байхгүй. Ердөө л хааш хаашаагаа таван метр орчим цементэн шалтай жижигхэн битүү өрөө гэдэг нь төвөггүй мэдэгдэнэ. Харин өрөөний баруун, зүүн талд хүн унтаж амрах зориулалттай төмөр хөлтэй, модон ор тавьжээ. Гэхдээ орон дээр ямар ч гудас, хөнжил байхгүй. Ийм өрөөнд ялтан Б.Содномдаржаа цааш харан зогсож байгаагаар бичлэг эхэлнэ. Төд удалгүй өөртэй нь хамт С.Зориг агсныг хөнөөсөн хэргээр ял авсан Ц.Амгаланбаатар, хүн амины гэмт хэрэгтэн И нар орж ирдэг. Тэд бүтэн зургаан өдрийн турш Б.Содномдаржааг дэглэж хэргээ хүлээхийг тулгаж, хэл амаар доромжилж байгааг бичлэгээс харж болно. 

Ц.Амгаланбаатар: Чи С.Зоригийг алаа биз дээ. Хэргээ хүлээ.

Б.Содномдаржаа: Би алаагүй. Би хүн алж үзээгүй. 

Ялтан И: Чи хэргээ хүлээгээч.

Ц.Амгаланбаатар: Тэгээд би чамайг гүтгээд байгаа юм уу, п... минь. Чи алсан биз дээ. 

Б.Содномдаржаа: Би хэнийг ч алаагүй. Ямар ч хэрэг хийгээгүй байж яаж хэрэг хүлээх юм. 

Ц.Амгаланбаатар: Өмдөө тайл, цамцаа ч бас... гэх мэт тэдний дунд бүтэн зургаан өдөр иймэрхүү төрлийн яриа өрнөнө. Энэ хооронд Ц.Амгаланбаатар, ялтан И нар Б.Содномдаржааг өдөр, шөнө аль ч цагт унтуулахгүй дэглэж, зодож танхайрдаг. Харин энэ үеэр ялтан Б.Содномдаржаагийн хавирга хугарсан гэдгийг албаныхан хэлж байлаа. Нөгөөтэйгүүр зургаан өдрийн турш нэг ч цурам хийгээгүй дэглүүлсэн Б.Содномдаржаа Ц.Амгаланбаатарт хандаж "Чи таван настай байхдаа ахаа гээд хөтлүүлээд явдаг байсан биз дээ" гэхэд "Би таван настай байх үеэ санахгүй байна. Чамайг хэргээ хүлээхгүй бол боогоод алчихна шүү"  гэх яриа ч камерт бичигдэж үлджээ. 

Энэ үеэр Ц.Амгаланбаатар Б.Содномдаржаа руу өрөөнд байх хувинтай шээс, өтгөн цацсан байдаг. Харин энэ үед Б.Содномдаржаа багахан эсэргүүцэл үзүүлж, Ц.Амгаланбаатартай барьцалдан авч байгаа дүр зураг ч бичлэгт үлдсэн байна. 

Удалгүй Ц.Амгаланбаатартай Б.Содномдаржааг барьцалдаж авах үеэр түүнтэй хамт орж ирсэн 192 см өндөртэй 90 кг орчим жинтэй хүн амины гэмт хэрэгтэн И түүний элэг, нуруун тус газарт нь цохиж, танхайрч байгаа нь камерт тод харагдана.  

 ШҮҮХИЙН ШИЙДВЭРИЙН АЖИЛТАН Б ХОРИГДЛЫН ДҮРЭЭР Б.СОДНОМДАРЖААГ ЭРҮҮДЭН ШҮҮЖЭЭ

Бүтэн зургаан өдрийн турш Б.Содномдаржааг дэглэж, хийгээгүй хэргийг нь хүлээлгэхийг тулгаж танхайрсан Ц.Амгаланбаатарыг өрөөнөөс гарахад түүнтэй зөрж Шүүхийн шийдвэр гүйцэтгэх ерөнхий газрын ажилтан Б орж ирдэг. Гэхдээ тэрбээр хоригдлын дүрээр өрөөнд орж ирэн Б.Содномдаржааг үргэлжлүүлэн эрүүдэн шүүж байгаа нь бичлэгт тод харагдана.

Хамгийн гол нь, түүний амнаас С.Зориг гэдэг үг гарахгүй зөвхөн ялтан Б.Содномдаржааг хэргээ хүлээхийг шаардаж, зодож танхайрч байгаа нь анхаарал татна.  

Тэрбээр Б.Содномдаржааг мөн л янз бүрийн үгээр хэлж, хэргээ хүлээхийг тулгадаг. Харин Б.Содномдаржаа "Би хүн алаагүй, би ямар ч хэрэг хийгээгүй" гэх аж. Энэ мэтчилэн Ц.Амгаланбаатар, хүн амины онц гэмт хэрэгтэн И болон шүүхийн шийдвэрийн ажилтан Б нар зургаан өдөр түүнийг нэг ч минут цурам хийлгүүлэхгүй гар дээр нь суниалгах, хоёр гарыг нь ард авахуулж явган суулгах, суугаагаар нь өрөөн дотор алхуулах  зэргээр дэглэж, зодож танхайрчихаад орхин гарч явж байгаагаар бичлэгийг дуусгажээ.  

Т.ЧИМГЭЭ: БИ ЯМАР Ч ХЭРЭГ ХИЙГЭЭГҮЙ

Ялтан Т.Чимгээгийн хоригдож байсан өрөө Б.Содномдаржаагийн эрүүдэн шүүлгэж байсан өрөөтэй ижилхэн ч өрөөний голдоо ганц ортой. Гэсэн ч ямар ч стандартын шаардлага хангахгүй, цонх болон агааржуулалт, бие засах газар байхгүй нь харагдана. Бичлэгийн хувьд архиваас сэргээсэн тул арай бүдэг, нягтрал багатай байлаа. Тиймдээ ч Ц.Амгаланбаатар болон Т.Чимгээ нарын яриа бараг сонсогдохгүй бүдэг бичигдсэн гэхэд болно.

Т.Чимгээгийн хоригдож байгаа өрөөнд 2015 оны есдүгээр сарын 8-ны 23.00 цагийн үед дээгүүрээ цээж нүцгэн, доогуураа биеийн тамирын хөх өмд өмссөн Ц.Амгаланбаатар орж ирж байгаагаар бичлэг эхэлдэг.

Тэрбээр 2015 оны есдүгээр сарын 9-ны 00.30 цаг хүртэл Т.Чимгээг хэргээ хүлээхийг шаардаж, хэл амаар доромжилж байгаа хэсэг багтжээ. Өөрөөр хэлбэл, Ц.Амгаланбаатар "Чи хэргээ хүлээ. Хэргээ хүлээчихвэл ял чинь хөнгөрнө. Б.Содномдаржаа та хоёр С.Зоригийг алсан чинь үнэн биз дээ" гэх зэргээр дарамталж, доромжилдог. Харин Т.Чимгээ "Би ямар ч хэрэг хийгээгүй. Би хүн алаагүй" гэхээс өөр үг хэлээгүй юм. 

ЭРҮҮДЭН ШҮҮХ АЖИЛЛАГААГ ТЕГ-ЫН ДАРГА АСАН Б.ХУРЦ, УЛСЫН ЕРӨНХИЙ ПРОКУРОРЫН ОРЛОГЧ АСАН Г.ЭРДЭНЭБАТ НАРЫГ ЗОХИОН БАЙГУУЛСАН ГЭВ

Ямартай ч Засгийн газрын шийдвэрээр С.Зориг агсны амь насыг хөнөөсөн хэргээр ял авсан Б.Содномдаржаа, Т.Чимгээ нарыг эрүүдэн шүүж байгаа 27 минут 8 секундын бичлэгийг хэвлэлийнхэнд үзүүллээ. Харин бичлэгээс Б.Содномдаржаа, Т.Чимгээ нарт хүч хэрэглэж, ял тулгасан гэх ганцхан зүйл л уншигдана. Тэднийг эрүүдэн шүүж, ял тулгасан хэргээр тагнуулын хоёр ажилтанг ШШГЕГ-ын харьяа Цагдан хорих 461 дүгээр ангид саатуулан шалгаж байгаа билээ.

Түүнчлэн ШШГЕГ-ын ажилтан Б-г цагдан хорьсон ч тодорхойгүй шалтгаанаар сулласан байдаг. Харин Б.Содномдаржаа, Т.Чимгээ нарыг эмнэлэгт хэвтүүлсэн талаар Хууль зүй, дотоод хэргийн сайд Ц.Нямдорж мэдээлсэн байдаг.

Тэрбээр Б.Содномдаржаа, Т.Чимгээ нарын ар гэрээс уучлалт гуйж, эмнэлгээс шоронд бус гэрт нь хариулна гэдгээ илэрхийлсэн юм. Түүнчлэн энэхүү эрүүдэн шүүлтийг ТЕГ-ын дарга асан Б.Хурц, Улсын ерөнхий прокурорын орлогч асан Г.Эрдэнэбат нарыг гардан зохион байгуулсан гэдгийг өнөөдөр /2019.03.29/ хэвлэлийнхэнд бичлэгийг үзүүлснийхээ дараа мэдэгдлээ.