Д.Сумъяабазар сайд Дубайн гэрээг цуцлах ёсгүй гэв

Далд уурхайн бүтээн байгуулалтын санхүүжилтийг шийдсэн Дубайн хэлэлцээрийг цуцлах шаардлагатай гэсэн санал дүгнэлтийг Оюутолгойн хөрөнгө оруулалтын гэрээний хэрэгжилтэд шалгалт хийсэн Ажлын хэсгийн зүгээс гаргаад буй. Тэгвэл Дубайн хэлэлцээрийг цуцлахгүй гэсэн байр суурийг салбарын сайд Д.Сумъяабазар Америкийн худалдааны танхим буюу АмЧамын уулзалтад оролцохдоо илэрхийллээ. Тэрбээр “Гуравдагч хөршийн бодлого Монгол Улсад зайлшгүй хэрэгтэй. Рио Тинто Оюутолгойгоос гарлаа гэхэд хэн орж ирэх вэ? Өмнөх засгийн газрууд бүгд л шийдвэрээ гаргасан. Дубайн гэрээг би сайн гэрээ гэж өмөөрөхгүй. Гэхдээ муйхраар шууд зогсоох зөв шийдэл биш ээ.  Хэлэлцээрийн ширээний ард сууж ухаалгаар шийдэх ёстой” гэж мэдэгдэв.

Сануулахад, өмнөх спикерийн захирамжийн дагуу байгуулагдсан Ажлын хэсэг гаргасан санал дүгнэлтээ УИХ-ын дарга Г.Занданшатарт хүргүүлээд байгаа. Дубайн хэлэлцээрийг цуцлах ёстой гэж Ажлын хэсгийн зүгээс байр сууриа илэрхийлсэн.

Тэгвэл Дубайн хэлэлцээрийг үзэглэсэн Ч.Сайханбилэг Далд уурхайн бүтээн байгуулалт, санхүүжилтийг баталсныхаа дараа байр сууриа илэрхийлэхдээ “Манай ажлын хэсэг, айлын ажлын хэсэгтэй Улаанбаатар хот, Өмнөговь аймаг, Сингапур, Лондон, Дубайд хэлэлцээр хийсний эцэст гарын үсгээ зурлаа. Өнөөдөөс эхлээд Оюутолгой бол Засгийн газрын ч асуудал биш, улс төрийн ч асуудал биш болно. Оюутолгой эдийн засаг болон компани хоорондын асуудал болно. Тийм учраас улс эх орноо боддог л юм бол өнөөдөр улстөрчид Оюутолгойн асуудалд хутгалдах шаардлагагүй. Одоо Оюутолгойг зүгээр л орхих хэрэгтэй ийм цаг ирсэн. Эрдэнэт үйлдвэртэй адилхан Оюутолгой гэдэг ийм том бүтээн байгуулалт, энэ том үйлдвэр маань өөрөө үргэлжлүүлж ажиллах шаардлагатай болсон” хэмээн мэдэгдэж байсан юм.