Геодези, зураг зүйн салбарын ажилтны II зөвлөгөөн болно

М.Хангал | Zindaa.mn
2019 оны 04 сарын 27

Барилга, хот байгуулалтын яам, Газар зохион байгуулалт, геодези зурагзүйн газар, Монголын геодези, фотограмметр, геодези, зурагзүйн холбоо хамтран "Геодези, зураг зүйн салбарын II зөвлөгөөн"-ийг энэ сарын 30-нд Төрийн ордонд зохион байгуулах гэж байна.

Зөвлөгөөнд БХБ-ын дэд сайд Б.Мөнхбаатар,  Газар зохион байгуулалт, геодези, зураг зүйн газрын удирдлагууд, Нийслэлийн Засаг дарга бөгөөд Улаанбаатар хотын захирагч С.Амарсайхан, Засгийн газрын болон УИХ-ын зарим гишүүд, БХБЯ-ны газрын дарга, агентлаг, харьяа байгууллагын удирдлага, Аймгуудын Газрын харилцаа, барилга хот байгуулалтын газрын дарга нар, нийслэлийн төр захиргааны байгууллагууд, Монголын геодези, фотограмметр, геодези, зурагзүйн холбоо, Геодези, зурагзүйн үйлдвэрлэл үйлчилгээ эрхлэх тусгай зөвшөөрөл бүхий аж ахуйн нэгжүүдийн 300 гаруй төлөөлөгч оролцоно.

Геодези, зурагзүйн салбар нь улс орны нийгэм, эдийн засгийн бүхий л салбар тэр дундаа батлан хамгаалах, аюулгүй байдал, байгаль орчин, хөдөө аж ахуй, геологи, уул уурхай, зам тээвэр, барилга, хот байгуулалт зэрэг салбарын суурь өгөгдөл, мэдээлэл болох газрын зураг, орон зайн мэдээллийн санг бэлтгэдэг юм.

Энэ удаагийн зөвлөгөөнөөр Геодези, зурагзүйн салбарт тулгамдаж буй асуудал, хууль, эрхзүйн орчныг боловсронгуй болгох шаардлага, Геодези, зураг зүйн салбарт улсын төсвийн хөрөнгө оруулалтаар хийгдэж буй төсөл, хөтөлбөрийн хэрэгжилт, салбарын хөгжлийн чиг хандлага болоод Геодези, зурагзүйн үйлдвэрлэлийн аж ахуйн нэгжүүдийн өнөөгийн байдал, чадавхыг дээшлүүлэх шаардлага, үнэлэмж, Нийслэл хотыг хөгжүүлэхэд Геодези, байрзүйн зургийн хэрэгцээ, салбарын боловсон хүчний хангамж зэрэг өргөн хүрээний хэлэлцүүлэг хийгдэх аж. 

Мөн Геодези, зурагзүйн салбарын хөгжлийг харуулсан үзэсгэлэн /хамгийн сүүлийн үеийн дроны өөрчлөлт шинэчлэлтийг багтаасан/ зохион байгуулагдаж төрөл бүрийн газрын зураг, атласыг толилон харуулах юм байна.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top