Гэрлэх саналаа “KFC”-д тавьсан залууд дэлхийн брэндүүд бэлэг илгээсээр байна

Өмнөд Африкийн “KFC”-д хайртай бүсгүйдээ гэрлэх санал тавьж байгаа залуугийн бичлэг цахим ертөнцийг эзэгнэсээр байна. Хектор гэгч залуу найз бүсгүй Нонлаладаа “KFC”-д гэрлэх санал тавих үеэр дэргэдүүр нь өнгөрсөн нэгэн эмэгтэй Өмнөд Африкийн эрчүүд хэрхэн ядуурсныг шоолсон утгатай тайлбар хийж, цахимд бичлэг оруулсан нь Хекторт харин ч тус болжээ.

“KFC” болон бусад алдартай брэнд хосуудыг хайж олон, бэлэг барьсаар байгаа юм. “Пума” гэхэд тэдэнд 680 ам.долларын ваучер өгсөн бол “Хуавэй” гар утас бэлэглэж, Стандарт банк хосын 20 мянга гаруй ам.долларын өрийг тэглэжээ.

Мөн “Ауди” компани тэдний хуримын дараа бал сараа тэмдэглэх газар нь хүргэж өгөхөөр болж, “McDonald's” бал сарын аяллыг нь дааж, “Uber” хуримд хэрэгтэй машин тээврийг зохицуулж, “Күү” хүнсний сүлжээ дэлгүүр 1300 ам.долларын худалдан авалт хийх эрх бэлэглэжээ. 

Энэ мэт бэлгүүд ар араасаа цуварсаар Өмнөд Африкийн нэгэн гар урлалын дэлгүүр хуримын гоёл чимэглэлийг нь хариуцахаар болжээ. Мөн сүйт бүсгүйн гоо сайханд нутгийнх нь нэгэн спа салон анхаарахаар болж, зарим дэлгүүр тэдэнд тавилга ч бэлэглэсэн байна.

Энэчлэн хүмүүс цахимд бичлэг байршуулж, шоолсон утгатай тайлбар бичсэн эмэгтэйг шүүмжилж, залуу хосыг дэмжин, хайр түгээсээр байна.