Түүх, археологийн ховор үзмэрүүдийг “Шинэ үзмэрийн дээжис-V” үзэсгэлэнгээр дэлгэнэ
Монголын Үндэсний музейгээс “Шинэ үзмэрийн дээжис-V” түр үзэсгэлэнд саатан морилж, өв соёлынхоо дээжистэй танилцаж, гэгээн оюунаа сүлж, гэрэлт мэлмийгээ баясгахыг урьж байна. Үзэсгэлэнгийн нээлтийн үйл ажиллагаа өнөөдөр /2019.12.27/ 16:00 цагт Монголын Үндэсний музейд болно.
Энэ удаагийн үзэсгэлэнд 2017-2019 оны хооронд музейн сан хөмрөгт шинээр бүртгэн авсан 227 дэсийн 604 үзмэрийг цогц байдлаар анх удаа дэлгэн үзүүлж үзэгчдийнхээ мэлмийг мялааж байна. Шинээр бий болсон энэхүү сан хөмрөгт археологи, түүх, угсаатны зүйн чиглэлийн ховор үзмэрүүд олон бий. Ялангуяа тус музейн судлаачдын археологийн малтлага судалгаагаар илрүүлсэн олдворууд нь монголчуудын төдийгүй дэлхий нийтийн анхаарлыг татаж буй өвөрмөц олдворуудаар баялаг байгаа нь энэ удаагийн үзэсгэлэнгийн гол онцлог юм. Тухайлбал, Монгол – Америкийн хамтарсан “Умард монгол” төслийн хүрээнд Хөвсгөл аймгийн Улаан-Уул сумын нутгаас илрүүлсэн Хориг уул хэмээх газар орших Дундад зууны Монгол язгууртнуудын булшны гайхамшигт олдворуудыг дурдаж болно.
Тус дурсгалаас олон үнэт эд зүйлс илэрч олдсоноос гадна анх удаа өрөм, шар тос бүхий ваар сав суулгыг илрүүлсэн нь олон нийтийн анхаарлыг зүй ёсоор татаж байна. Уг дурсгалууд XIII-XIV зууны Монгол язгууртнуудын булш оршуулга болохыг дээрх олдворууд харуулж буйгаараа онцгой ач холбогдолтой. Үүнээс гадна Монголын Үндэсний музейн судлаачдын Ховд аймгийн Мянгад сумын Урд улаан үнээт хэмээх газраас илрүүлсэн Жужаны хаант улсын үед холбогдох хадны оршуулга, Монгол – Америкийн хамтарсан “Баруун Монгол”, Монгол - Хятадын хамтарсан “Шийтэр”, “Айрагийн гозгор дахь эртний нүүдэлчдийн соёл иргэншил”, Монголын Үндэсний музей – Олон улсын Түрэг Академитай байгуулсан Хэнтий аймгийн Дэлгэрхаан сумын Гүнбүрд, Хаяа худаг хэмээх газарт явуулсан “Хэрлэн” төслийн малтлага судалгаагаар олдсон олон олдворуудыг дурдаж болно. Мөн ард иргэдийн бэлэг хандив, тэднээс худалдан авсан үзмэрүүд эл үзэсгэлэнд чухал байр суурь эзэлж байна.
Үзэсгэлэн 2020 оны хоёрдугаар сарын 10-ны өдөр хүртэл гарна.
Холбоотой мэдээ
Сэтгэгдэл ( 0 )