ОСОЛ: Амиа алдсан 177 зорчигчийн хамгийн бага нь нэг ойтой байжээ

Ираны Имам Хомейнигийн нэрэмжит Олон улсын нисэх буудлаас хөөрсөн "Боинг 737" онгоц хоёр минутын дараа осолдож,  168 зорчигч, нисэх багийн 9 гишүүн гээд нийт 177 хүн бүгд амь үрэгдсэн билээ. (Бичлэг үзэх)

Энэ сарын 8-нд Ираны нийслэл Тегеран хотноо осолдсон Украины иргэний агаарын тээврийн "Боинг 737" онгоцонд долоохон хоногийн өмнө хуримаа хийсэн хос явж байжээ.

Араш Пурзараби, Пунех Горжи нар нэгдүгээр сарын 1-нд эцэг эх, найз нөхдийн өмнө тангараг өргөн, хувь заяагаа холбожээ. Долоохон хоногийн дараа тэд золгүй нислэгээр Канад руу харихаар явсан байна.

Хөөрснөөсөө хойш хэдхэн минутын дотор сүйрсэн онгоцонд мөн Канадын нийт 63 иргэн байв. Хосуудаас гадна 7-9 настай хоёр хүүтэй швед гэр бүл, хоёр хүүхэдтэй канад гэр бүл, нэг гэр бүлийн гурван гишүүн, гэр бүлийн хосууд амиа алджээ. Хамгийн залуу зорчигч 2018 онд төрсөн Курдиа Молани байв.

Зорчигчдын 26 нь 18 нас хүрээгүй хүүхдүүд байсан ба тэдний 13 нь арваас доош настай байжээ.

Нисэх багийн ахлагч Володимир Гапоненко "Боинг 737" онгоцоор нийт 11,600 цаг, зааварлагч нисгэгч Олексий Наумкин "Боинг 737" онгоцоор нийт 12 мянган цаг, нэгдүгээр нисгэгч Сергей Хоменко 7600 цагийн нислэг үйлдэж байсан туршлагатай ба тэд бүгд Украины шилдэг нисгэгчид байсан юм.

Тегеран-Киевийн чиглэлийн нислэгийн "Боинг 737" онгоцонд нийт 168 зорчигч, нисэх багийн есөн хүн байснаас 83 нь Ираны, 63 нь Канадын, 11 нь Украины, 10 нь Шведийн, дөрөв нь Афганистаны, гурав нь Германы, гурав нь Их Британийн иргэд байжээ.

ОСЛЫН ДАРАА....