З.Энхболд: Түрүүчийн сонгуулиар би онгоцоор улс тойрсоор байгаад өөрөө унасан

Монгол Улсын Ерөнхийлөгчийн Тамгын газрын дарга З.Энхболд өнөөдөр /2020.02.13/ үүрэгт ажлаасаа чөлөөлөгдөх хүсэлтээ Ерөнхийлөгчид өгсөн байна. Түүнээс дараах асуултад хариулт авсан юм.

-Та ямар учраас үүрэгт ажлаа өгч байгаа вэ?

-Би ажлаа өгөх гэж байна. гурван сарын дараа сонгуулийн компанит ажил эхэлнэ. Сонгуулийн ажилдаа төвлөрөх шаардлагатай байгаа учраас ажлаа өгнө. Ерөнхийлөгч хүлээж авна гэж амласан учраас өнөөдөртөө ажлаа өгчихнө байх. Янз бүрийн цуурхал гарсан учраас албан ёсоор тайлбар хийе. Цуурхлууд үндэслэлгүй. Харин сонгуульдаа төвлөрөх үүднээс ажлаа өгсөн нь үнэн шүү.

-Та хаанаас нэр дэвших вэ?

-Би хаанаас ч дэвшиж магадгүй. Судалгаа хийнэ.

-Та ардчилсан намд албан тушаал хашиж байгаа юу?

-Би ардчилсан нам дээр ямар ч албан тушаал дээр очихгүй. Энэ оны нэгдүгээр сарын 1-нээс С.Эрдэнэ даргын ахлах зөвлөх болсон. Тэр ажлынхаа хүрээнд сонгуулийн ерөнхий ажилд ямар нэгэн байдлаар оролцоно.

-Ерөнхийлөгчтэй түнжин муутай байгаа гэх мэдээлэл гарсан. Үүнд тайлбар өгнө үү?

-Ерөнхийлөгчтэй эв түнжин сайн байгаа. Ерөнхийлөгч сонгууль дөхөж байна, та ажлаа хий гэсэн. Миний оронд Монголын хөл бөмбөгийн холбооны ерөнхий нарийн бичгийн дарга Ө.Шижир ирнэ. Би чинь амиа бодмоор байна шүү дээ. Сонгууль болоход гуравхан сар үлдээд байна. Түрүүчийн сонгуулиар би онгоцоор улс тойрсоор байгаад өөрөө унасан. Одоо алдаагаа давтахгүйн тулд аль нэг тойргийг сонгоод гурван сар бэлтгэл хиймээр байна.

-Та намын удирдлагуудтайгаа хэвийн харилцаатай байгаа юу?

-Би бүх хүнтэй хэвийн харилцаатай байгаа. Хэвийн харилцаагүй гэж цуурхал тараадгаа болих хэрэгтэй.

-Улс төрийн албан тушаалтан учраас ажлаа өгөхгүйгээр сонгуульд орж болно шүү дээ.

-Би огцрохгүйгээр ажиллаж болох байлаа. Харин надад хамаагүй зүйлийг надад наагаад байгаа учраас Ерөнхийлөгч сонгуулиа бод гэсэн. Бодвол МАН-ынхан гомдсон юм байлгүй дээ. Юун ч эмзэг юм. Ганц нэвтрүүлгээс болоод Ерөнхий сайддаа ховлоод л. Д.Тогтохсүрэн нар л яваад байх шиг байгаа юм.