БНХАУ: Онгоцны ослын шалтгааныг тогтооход хүндрэлтэй байна

БНХАУ-ын өмнөд хэсэгт осолдсон “China Eastern Airlines” компанийн “Боинг 737” онгоц маш хүчтэй сүйрсэн тул ослын шалтгааныг тогтооход ихээхэн хүндрэлтэй байна гэж тус улсын Иргэний агаарын тээврийн удирдах газрын нислэгийн аюулгүй байдал хариуцсан захирал Жу Тао мэдэгджээ.

Түүний мэдээлснээр, аврагчид ослын газарт нэг км радиуст самналт хийж, зорчигчдын цогцос, хар хайрцгийг хайж байна. Энэ ажилд 600 орчим цэрэг, цагдаа, гал сөнөөгч дайчлагджээ.

“China Eastern Airlines” компанийн “Боинг 737” онгоц энэ сарын 21-нд Күнмин хотоос Гуанжоу чиглэлд нисэж байхдаа осолдож, 123 зорчигч, багийн есөн гишүүн амиа алдсан билээ.