С.Мөнхчулуун: Үндэслэлгүй ҮНИЙН ХӨӨРӨГДЛИЙГ хязгаарлахыг хичээнэ

Засгийн газрын ээлжит бус хуралдаан өчигдөр (2022.04.15) болж, зарим томилгооны асуудлыг хэлэлцсэн байна. 

ШӨХТГ-ын даргаар С.Мөнхчулууныг томиллоо. Тус газрын даргаар ажиллаж байсан Т.Гантулга өөрийн хүсэлтээр ажлаасаа чөлөөлөгдөх хүсэлтээ өгчээ. 

С.Мөнхчулуун хүлээн авсан ажил болон цаашид хийж хэрэгжүүлэх ажлынхаа талаар "Бидний амьдралд тохиож буй түүхэн хүнд үе болох дэлхий нийтийг хамарсан цар тахал, Орос Украины дайнаас үүдэлтэй эдийн засгийн хямрал, үнийн өсөлт оргилдоо хүрсэн цаг үед энэхүү хариуцлагатай албанд томилж буй нь Монгол Улсын Засгийн газраас хүлээлгэж буй нөр их итгэл, өндөр хариуцлага гэж ойлгож байна. Тиймээс миний бие Монгол улсын хууль тогтоомж, Засгийн Газрын шийдвэрийн хүрээнд Зах зээлд чөлөөт өрсөлдөөний таатай орчинг бүрдүүлж, шударга нээлттэй өрсөлдөөнийг дэмжиж, хэрэглэгчдийн эрх ашгийг хамгаалж, үндэслэлгүй үнийн хөөрөгдлийг хязгаарлахын төлөө хичээн зүтгэх болно.

Манай байгууллага нь Өрсөлдөөний тухай хууль, Хэрэглэгчийн эрхийг хамгаалах тухай хууль, Зар сурталчилгааны тухай хууль, Зөрчлийн тухай хууль болон бусад хууль тогтоомж, Засгийн газрын тогтоол шийдвэрүүдийн хэрэгжилтэд хяналт тавьж ажилладаг юм. Мөн өчигдөр батлагдсан ГОЛ НЭР ТӨРЛИЙН ЗАРИМ БАРАА, БҮТЭЭГДЭХҮҮНИЙ ҮНИЙН ӨСӨЛТ, ХОМСТЛООС СЭРГИЙЛЭХ, СӨРӨГ НӨЛӨӨЛЛИЙГ БУУРУУЛАХ ТУХАЙ ХУУЛИЙН хэрэгжилтийг хангахад тодорхой үүрэг гүйцэтгэж ажиллах болно.

Иймд иргэд, аж ахуйн нэгжүүдээс Гомдол санал хүлээн авах Иргэдийн утас 115 дугаараас гадна нээлттэй харилцан уялдаатай, эргэх холбоотой ажиллах үүднээс фэйсбүүкын https://www.facebook.com/groups/391583442769715/групп нээж байнгын санал, хүсэлт, гомдол авч үйл ажиллагаандаа анхаарч ажиллана" гэсэн байр суурийг илэрхийлжээ.