"Хөндий дэх аллага"-ын сэжигтэн хөгжлийн бэрхшээлтэй эцэг, эхээ АСАРДАГ байжээ

Өмнөд Солонгост дуулиан тариад байгаа "Хөндий дэх аллага" хэргийн сэжигтэн И Ин Э болон Жо Хён Сү нарыг Гоян дахь нэгэн оффисоос баривчилсан билээ. 

Даатгалын мөнгө авахаар нөхрөө хөнөөсөн хэрэгт сэжиглэгдэж буй И Ин Эгийн тухай мэдээлэл цацагдаж эхлэхтэй зэрэгцэн түүний өнгөрсөн амьдрал ил болж эхэллээ. Тухайлбал, дунд сургуулийн зургадугаар ангид байхдаа "Хайрын байшин" цэнгээнт нэвтрүүлэгт оролцож байсан түүний дүрс бичлэгүүд цацагдаж эхэлсэн байна. 

Уг бичлэг 2002 оны гуравдугаар сард цацагдаж байсан бөгөөд хөгжлийн бэрхшээлтэй эцэг, эхээ асардаг, цовоо сэргэлэн охин халамжийн мөнгөөр амьдардаг тухайгаа дурдаж байсан аж.

Эцэг, эхээ асрахын тулд шаргуу хөдөлмөрлөж, үүнээсээ ичиж, санаа зовдоггүй тухайгаа эелдгээр ярьж байсан охин шинэхэн байшингаа заан, "Би том болоод тусламж хэрэгтэй байгаа хүмүүст авсан шигээ тус хүргэх болно" хэмээн амлалт өгч байсан нь олны хайрыг татаж байжээ. 

Уг бичлэгийг үзсэн интернет хэрэглэгчид охиныг тэс өөр нэгэн болж өссөнийг хараад цочролд орсон гэнэ. 

И Ин Эг нөхрийгөө даатгалын мөнгө авах санаатайгаар хөнөөсөн хэрэгт буруутгахаас гадна өөр хоёр хохирогчийн үхэлд буруутай байж магадгүй хэмээн шалгаж эхлээд байна.