Хөгжлийн банкны зээлээс 502.7 тэрбумыг эргэн төлжээ

Б.Гантуяа | Zindaa.mn
2022 оны 07 сарын 20

Засгийн газрын ээлжит хуралдаан өнөөдөр (2022.07.20) болж, Сангийн сайд Б.Жавхлан Засгийн газрын хуралдаанд Хөгжлийн банкны чанаргүй зээлийн эргэн төлөлтийн талаар танилцууллаа.

Улмаар Засгийн газрын өнөөдрийн хуралдаанаас “Монгол Улсын Хөгжлийн банкнаас олгосон зээлийн өр төлбөрийг барагдуулах зарим арга хэмжээний тухай” Засгийн газрын 2022 оны 05 дугаар сарын 31-ний өдрийн 220 дугаар тогтоолын хэрэгжилтийг эрчимжүүлж ажиллахыг холбогдох албан тушаалтнуудад даалгалаа. 

Хуралдааны дараа Монгол Улсын Хөгжлийн банкны гүйцэтгэх захирал Н.Мандуул хэвлэлд мэдээлэл өгсөн юм.

Тэрбээр “Монголбанкнаас 2021 оны 12 дугаар сарын 21-ний өдөр гаргасан 12039/01 дугаартай актаар Хөгжлийн банкны нийт олгосон зээлийн багцад эзлэх чанаргүй зээл 57 хувь буюу 1.8 их наяд төгрөгт хүрээд байсан. Энэ нь тус банкны үйл ажиллагаанд сөргөөр нөлөөлөх бодит үр дагавар үүссэн тул нөхцөл байдлыг харгалзаад 2022 оны 01 дүгээр сарын 20-нд олон нийтэд нээлттэй мэдэгдэж, Засгийн газар, Сангийн яам, төрийн холбогдох байгууллагууд хамтран ажилласнаар эхний хагас жилийн байдлаар 481.8 тэрбум төгрөгийн зээлийн үлдэгдлийг төлүүлсэн юм. Улмаар 07 дугаар сарын 17-ны байдлаар зээлийн эргэн төлөлтийн дүн 502.7 тэрбум төгрөг болжээ. Үүнээс 262.3 тэрбум төгрөгийн зээл бүрэн төлөгдөж, зээлийн дансыг хаасан байна” гэлээ.

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Зочин (124.158.67.221) 2022 оны 07 сарын 21

1.8 их наядийн чанаргүй зээлээс 502 тэрбум төлжээ Зээл авсан бусад авилгачид нөхөдүүд зээлээ төлөөчөө улс орон чинь дампуурлын ирмэгт хүрчихээд бнаа

0  |  0
Top