Ж.Сүхбаатар: Даатгалд хамрагдаагүй, зөрчилтэй машиныг ЗОГСООЖ болно

Нийслэлийн асуудал эрхэлсэн сайд Ж.Сүхбаатар "алхалт бол ухамсар юм" хэмээн сошиалаар уриалаад байгаа.

Тэрбээр түгжрэл өнөөдөр гэнэт шийдэгдэх асуудал биш гэдгийг учирлаж байгаа ч зам дээр 5-6 цаг тэг зогсолт хийж буй иргэд бухимдлаа илэрхийлсээр байна. 

Нийслэлийн асуудал эрхэлсэн сайд Ж.Сүхбаатар замын ачааллыг бууруулах тухайд "Дугаарын хязгаарлалтыг сайжруулсан хувилбараар хийх боломж бий. Дугаарын хязгаарлалтыг үргэлжлүүлэхгүй гэдэг байр суурин дээр хэвээр байгаа, үргэлжлүүлэхгүй. Харин даатгалд хамрагдаагүй, зөрчил гаргадаг машинуудыг зогсоож болно. Гэхдээ үүнийг хэрэгжүүлэх механизм одоогоор байхгүй. Үүнийг бий болгох тал дээр ажиллаж байна. Богино хугацаанд түгжрэлийг бууруулъя гэвэл захиргааны зохицуулалтыг л хийж таарна. 161 уулзвар дээр хянах төхөөрөмж суурилуулсан. Удахгүй систем ажиллаж эхэлнэ. Түгжрэл 20 хувиар буурна гэж тооцоолж байна" гэлээ. 

Мөн тэрбээр дүүжин тээвэр буюу LRT-ийг төслийг дэмжиж байгаагаа илэрхийлээд, түгжрэлийн эсрэг багц хуулийн төслийг өргөн барина гэсэн юм.

Хуулийн төслөөр хуучин машин оруулж ирж болох эсэх, зогсоолын асуудал, тансаг хэрэглээний татвар зэргийг тусгахаар төлөвлөөд байгаа аж.