ДУУЛИАН | "Physical: 100" шоу үзэгчдээ мэхэлсэн үү?

"Netflix"-ийн гадаад хэл дээрх шоу төрлийг хэдэн долоо хоногийн турш тэргүүлсэн "Physical: 100" шоу өнгөрсөн долоо хоногт дуусч, ялагчаа тодруулсан билээ. Оролцогч Ү Жин Ён шоуны ялагчаар тодорч 300 сая вонын эзэн болсон бөгөөд түүнийг заль мэх ашиглан ялагч болсон гэх мэдээлэл олон нийтийн мэдээллийн хэрэгслээр цацагдаж эхэлжээ. 

Шоуны сүүлийн даалгавар дээр оролцогч Жон Хэ Миний олс татагдах боломжгүй болж гацсан. Үүний улмаас тэрээр тэмцээнийг цааш үргэлжлүүлэх боломжгүй болсноор Ү Жин Ён ялагч болсон юм. Үзэгчид Ү Жин Ёны олс татахад илүү хялбар харагдаж байсан тухай гомдол гаргажээ. Илё Шинмун сэтгүүлд мэдээлснээр олс татах тэмцээн дундаа орж байх үед Ү Жин Ён техникийн асуудал гарсан гэх шалтгаанаар тэмцээнийг зогсоожээ.

Зохион байгуулагчдын баг шалгалт хийгээд ямар нэгэн асуудал байхгүй гэдгийг баталсан. Харин Ү Жин Ён "хэт их дуу гарч байна" хэмээн зүтгэсэн учир тэдний дамарын тосолж өгсөн байна. Энэ нь оролцогчдын тэмцээнийг илүү хөнгөвчилж өгсөн бөгөөд оролцогч Жон Хэ Мин ялалт байгуулжээ.

Гэтэл зохион байгуулагчдын баг дүрс бичлэгт дууны асуудал гарсан учраас тэмцээнийг дахин эхлүүлэх санал гаргажээ. Арын албаны 5 ажилтан түүнийг тэмцээнээ дахин эхлүүлэхийг ятгаж эхэлсэн бөгөөд олсныхоо уртаас багасгах санал тавьсан байна. Оролцогч Жон Хэ Мин хоёр удаа олс татахдаа бүх хүчээ шавхсан учраас тамиргүй болсон тухайгаа зохион байгуулагчдад учирлажээ. Эцэст нь тэрээр дахин өрсөлдөхийг зөвшөөрсөн ч харамсалтай нь ялагдал хүлээсэн байна. 

Энэхүү асуудалд хоёр оролцогч одоогийн байдлаар ямар нэгэн хариу өгөөгүй байна. Шоуны эцсийн шатны тэмцээнийг бусад оролцогчид өөр өрөөнөөс үзэж байсан учраас нарийн ширийн зүйлийг мэдэхгүй байна хэмээн ярьжээ. 

MBC-ийн зүгээс эцсийн тэмцээн гурван удаа болсон гэдэг нь худал зүйл хэмээн мэдээлж, худал мэдээлэл тараасан хүмүүст хуулийн арга хэмжээ авах болно гэдгээ анхааруулав. "Netflix"-ийн зүгээс мөн тэмцээний үеэр ямар нэгэн асуудал гараагүй хэмээн мэдээлээд байгаа аж. 

Илё Шинмун сэтгүүлд арын албанд ажиллаж байсан хүмүүс мэдээлэл өгсөн бөгөөд энэхүү асуудлаас үүдэн "Physical: 100" шоуны хэвлэлийн бага хурлыг цуцлаад байна. 

Мөн оролцогч Ү Жин Ёныг зохин байгуулалттайгаар тус тэмцээнд түрүүлсэн байж болзошгүй гэх өөр нэгэн таамаг бий. Тэрээр финалд өрсөлдөх оролцогчдыг шалгаруулах шатанд гурван оролцогчийн хамт тасралтгүй гүйх тэмцээнд оролцсон. Ингэхдээ хавирга нь хугарч, амьсгалахад ч хүндрэлтэй байсан оролцогч Ча Хён Сыний урд зогссон нь уг тэмцээнд төвөггүйхэн ялах нэг шалтгаан болжээ.