Ши Жиньпиний Европ дахь айлчлал эхлэв

БНХАУ-ын дарга Ши Жиньпинийн Францад хийж буй албан ёсны айлчлал эхэлжээ. Тэрбээр Францын Ерөнхийлөгч Эммануэль Макрон, Европын комиссын тэргүүн Урсула фон дер Лейентэй уулзах хөтөлбөртэй.

Хятадын тэргүүний Францад хийж буй айлчлал нь хоёр улсын хооронд дипломат харилцаа тогтоосны 60 жилийн ойн хүрээнд болж байна. Ши Жиньпин Францын тэргүүнтэй хоёр улсын харилцааны болон Хятад, Европын Холбооны харилцааны асуудлаас гадна олон улсын болон бүс нутгийн чанартай асуудлыг хэлэлцэхээр төлөвлөж байна. Мөн талууд Украин дахь мөргөлдөөнийг зохицуулах арга замыг эрэлхийлнэ гэж мэдэгдэлд онцолжээ.

“Бид Европт энх тайван, тогтвортой байдал эргэн ирнэ гэж найдаж байна. Бээжин мөргөлдөөнийг энхийн замаар шийдвэрлэхэд бүтээлч үүрэг гүйцэтгэсээр ирсэн” гэж Ши Жиньпин “ Le Figaro ” хэвлэлд өгсөн ярилцлагадаа онцолжээ. Европ хийж буй айлчлалынхаа хүрээнд Хятадын тэргүүн Серби, Унгарт мөн айлчлах товтой.