Н.Мөнхшүр ОЮУНЫ ОЛИМПЫН АВАРГА боллоо

Дөрвөн жилд нэг удаа зохион байгуулагддаг MEMORIAD World Mental Sports Olympics (Memory, Mental Calculation and Speed Reading) буюу Оюуны олимп АНЭУ-ын Дубай хотод өчигдөр (2024.11.07) эхэллээ.

Тэмцээнд 35 улсаас өсвөр, насанд хүрэгчдийн ангилалд 12 төрлөөр 180 тамирчин өрсөлдөж байна. 

"Оюуны олимп"-ын эхний төрөл болох "Хурдны хөзөр" төрлийн дүн гарахад бага (13 хүртэл нас) болон насанд хүрэгчдийн (13-аас дээш нас) ангилалд манай тамирчид медалийн эзэд болцгоолоо.

Насанд хүрэгчдийн ангилал:
 

• Алт: Н.Мөнхшүр 19.47 сек
• Мөнгө: Ц.Оюун-Эрдэнэ 20.62 сек
• Хүрэл: Ц.Номин-Эрдэнэ 22.05 сек

Бага насны ангилал:

• Алт: О.Ирмүүн 37.8 сек

Ийнхүү ой тогтоолтын хоёр удаагийн Дэлхийн аварга, Олон Улсын Их мастер Н.Мөнхшүр хөзрийн төрөлд алтан медаль хүртэж, "ОЮУНЫ ОЛИМПЫН АВАРГА" хэмээх их амжилтын эзэн болж, медалийн буухиаг эхлүүллээ.
 

Х.АНИРЛАН ОЮУНЫ ОЛИМПЫН МӨНГӨН МЕДАЛИЙН БОЛЗОЛ ХАНГАЛАА

“Оюуны олимп”-ын хоёр дахь төрөл болох цээж бодолтын "Mental Multiplications" буюу 8 оронтой 2 тооны үржвэрийг олох төрөлд нийт 10 бодлогыг 6 минутад алдаагүй бодсоноор Х.Анирлан оюуны олимпийн мөнгөн медалийг мөн эхний өдөр хүртээд байна.

Дашрамд дурдахад, энэ удаагийн тэмцээн нь Монголын тамирчдын оролцож буй Олон улсын 70 дахь тэмцээн аж. Өнгөрсөн 15 жилийн хугацаанд манай баг тамирчид Олон улсаас 140 цом, 1500 гаруй медаль хүртэж, Гиннесийн болон Дэлхийн олон дээд амжилтыг тогтоон, эзэмшиж байгаа билээ.