Чу Дэ Хүн: Дүрээ бүтээхийн тулд ааваасаа санаа авч байсан

Netflix-ийн шилдэг гадаад хэл дээрх кино болсон "When Life Gives You Tangerines" киноны Бу Сан Гилийн дүрийг бүтээсэн жүжигчин Чу Дэ Хүн дүрээ бүтээхийн тулд ааваасаа санаа авч байсан тухайгаа саяхан оролцсон нэвтрүүлгийнхээ үеэр дурджээ. 

Хал нь гаднаа ч хайр нь дотроо орших эцгийн дүрийг бүтээсэн тэрээр "Бу Сан Гилийн дүрийг би залуу наснаас нь эхлээд хөгшрөх хүртэл нь бүтээж амьдралынх нь бүхий л үе шатыг нь харуулахыг хичээсэн. Хөгшин үеийнх нь дүрийг бүтээхэд би зүгээр л хөгшин хүмүүсийг дуурайгаад байгаа мэт санагдаад байсан юм л даа. Тэгээд би цэцэрлэгт хүрээлэн, метро зэргээр явж хүмүүсийг ажиглаж эхэлсэн. 

Бу Сан Гилд ааваасаа санаа авсан хэсэг бий. Нэг үзэгдэл дээр надад өгсөн хувцас нь аавын минь өмсдөг байсан улаан товчтой цамцтай яг адилхан байсан. Эгч нар маань бүгд Америкт амьдардаг юм л даа.

Тэд энэ хэсгийг үзээд над руу уйлаад л залгасан. Тэд "Хөөе, чи энэ улаан цамцыг нь кинонд өмсөх гэж авч очсон юм уу?" гэж асуусан. Би тэдэнд "Үгүй ээ, надад цаанаас нь өгсөн юм аа" гэж хэлсэн. Би ч мөн тэр хувцасыг хараад үнэхээр их гайхсан тул өмсөхөөсөө өмнө удаан ширтэж байснаа санаж байна. 

Аав маань 178 см өндөр, 100 кг жинтэй, баргил хоолойтой нэгэн байсан. Би том гэдэстэй, хөгшрүүлсэн нүүр будалттайгаар хувцасаа өмсөж үзэхдээ яг л аавыгаа толинд харж байгаа мэт л болсон. Үүнээсээ урам зориг, санаа авч дүрээ сайн бүтээсэн гэж бодож байна. Аав маань бас их ёжилж, хайхрамжгүй мэт ярьдаг хүн байсан. Үүнийг нь ч мөн кинондоо ашигласан.

Түүний баруун тархинд цус харваж унтаж байхдаа нас барсан юм л даа. Би түүнийг шалан дээр унтаж байхыг хараад хөнжлөөр хучсан. Гэсэн ч тэр маргааш өглөө нь сэрээгүй"  гэжээ.