Mzinho: Энэ бол Монголын багийн спортын хамгийн том амжилт

Мэйжорын гол тэмцээн CS2-ийн финалд хүрсэн The MongolZ Дэлхийн маш хүчтэй өрсөлдөгч болж, нэрээ гаргалаа. Энэ бол зөвхөн Монголын бус Азийн Esport-ийн түүхэн амжилт болсны зэрэгцээ ард түмнийхээ ч баатар боллоо гэж хэлж болно.

“Яг одоо эх оронд маань олон мянган хүн биднийг гайхалтай, галзуу дэмжиж байгаа. Үндэстэн даяараа бидний ард зогсож байгаа. Элэг нэгтнүүд маань бүгдээрээ биднийг дэмжиж байна гэдэг нэр хүндтэй явдал.

Миний бодлоор бол манай улсын багийн спортын түүхэн дэх хамгийн том амжилт энэ болов уу. Жүдо зэрэг хувийн спортоор бол монголчууд бид илүү олон том амжилт гаргасан ” Б.Аюуш буюу Mzinho мэдэгдсэн юм.

Түүний хэлсэн гарцаагүй үнэн. Үүрийн 4 цагт Сүхбаатарын талбайд 10 гаруй мянган залуус цуглан, том дэлгэц дээр финалын тоглолтыг догдлон үзлээ.

Хэдийгээр финалд хожигдсон ч гэлээ 2008 оны Бээжингийн олимпын наадамд монголчууд анхны алтан медалиа хүртсэний дараагаар ард түмэн Сүхбаатарын талбайг дүүргэж, бүгдээрээ эвтэй найртай, гайхамшигтай сайхан баяраа тэмдэглэсэн оройг санагдуулам үйл явдал болоо.

Зөвхөн Сүхбаатарын талбайд ч бус өөр олон газар фанатууд цуглан, дэмжсэн бөгөөд 85 мянга гаруй хүн шууд эфирээр тоглолтыг үзлээ.

The MongolZ-ийн лого алсыг харагч дээр гэрэлтэж, 10 гаруй мянган залуус Сүхийн талбайд цуглаж, ард түмэн тэр аяараа дэмжиж, нэгэн үүрийг эв нэгдэлтэй сайхан угтлаа. Монголчуудаа The MongolZ ийнхүү нэгтгэж чадлаа.