Үе үеийн тээвэрчид Д.Сумъяабазарыг дэмжинэ

Сонгинохайрхан дүүрэгт МАН-аас нэр дэвшигч НИТХ-ын төлөөлөгч Д.Сумъяабазар үе үеийн тээвэрчидтэй “Драгон” төвд уулзалт хийлээ. Уулзалтанд тээврийн байгууллагаас төрөн гарсан сайчууд, онц тээвэрчид, гавьяатууд болон түүний аав ахмад тээвэрчин, Монгол улсын манлай заан Долгорсүрэн нарын 300 гаруй тээвэрчид хүрэлцэн ирсэн байлаа.

Тээвэрчний үр удам, залуу бизнесмэн, шилдэг улстөрч Д.Сумъяабазараар үнэхээр бахархаж явдагаа илэрхийлж тэд цөмөөрөө магтаал, урмын үг хэлцгээсэн юм. Энэ удаагийн сонгуульд манай ууган улстөрийн хүчин МАН залуучуудаа бидэнд илгээсэнд бид бүхэн сэтгэл хангалуун байна.

Өмнөх сонгуулиар нэр дэвшсэн нөхдүүд одоо хаачив. Тэд нар шиг алга болохгүй гэж залуучууддаа найдаж итгэл хүлээлгэнэ гэдгээ үе үеийн тээвэрчид амаллаа. Харин та бүгдийнхээ итгэлийг өндөрт өргөж зорьсон зорилгодоо хүрч сайхан Монгол орноо цэцэглэн хөгжихийн төлөө чөмгөө дундартал зүтгэхээ нэр дэвшигчид маань хэллээ.

Д.Сумъяабазарын хувьд үнэхээр тэгж чадахаар залуу хүн. Яагаад гэвэл өмнөх дөрвөн жилд НИТХ-д суухдаа Сонгинохайрхан дүүрэг болон нийслэл хотынхоо төлөө чамалхааргүй их ажлыг хийж бүтээсэн нь өнөөдөр нүднээ илт байна. Түүнийг эгэл жирийн ардын дундаас урган гарсан цэцэг гэж  тэнд хуран цугласан тээвэрчид сайшааж, Монгол хүний нарийн ухаанаар  энэ төрийг засч ажилаарай хэмээн захилаа.

А.ТЭМҮР