Г.Батхүү, Д.Зоригт нар маргааш УИХ-ын гишүүний тангараг өргөхгүй бололтой

Чуулган хойшилж Төрийн ордон хөл хөдөлгөөн багатай байна. Учрыг тодруулахад орон нутгийн сонгуультай холбоотойгоор УИХ-ын гишүүдийн дийлэнх нь хөдөө орон нутагт ажиллаж байгаа гэсэн мэдээлэл ирэв. Харин энэ цаг үед УИХ-ын  гишүүн Ж.Энхбаяр албан өрөөндөө байсан бөгөөд түүнээс тодруулга авлаа.

-Маргааш чуулганыг хойшлуулна гэсэн яриа байна?

- Тэр талаар яригдсан зүйл алга.

- АН олонхоороо ялалт байгууллаа гэж мэдээлж байна.  Та үүнд ямар байр суурьтай байна вэ?

- АН 2008 оны орон нутгийн сонгуулиас илүү амжилт гаргасан нь бодит үнэн. Харин ямар байдлаар хэлж байгаа нь тухайн хувь хүний хувийн араншин.

- Маргааш Г.Батхүү, Д.Зоригт нар тангараг өргөнө гэж яригдаж байна. МАН-ын албан бус бүлэг ямар арга хэмжээ авах вэ?

- Шүүхийн шийдвэрээ л харна шүү дээ.  Яг одоогоор шүүхийн шийдвэр гарсан эсэх талаар мэдээлэл алга. Эцсийн  шийд гарвал тэр дагуу л явах болов уу даа.

Түүний хариултаас үзэхэд  УИХ-ын чуулганд Г.Батхүү, Д.Зоригт нар маргааш тангараг өргөх нь  худлаа болж байх шиг байна. Бид маргаантай тус тойргийн  талаар эргэн мэдээлэх болно.

А.Баярмаа