Салаавчаар ам.доллар бууруулсан уу...

УИХ-ын гишүүдийн дунд салаавч гаргадаг моод дэлгэрээд удаж буй. Тухайлбал УИХ-ын гишүүдээс хамгийн анх салаавч гаргасан хүн бол Ш.Сайхансамбуу билээ. Тэрээр өнгөрсөн 2012 оны нэгдүгээр сарын 27-ны өдөр төрийн ордонд Б.Бат-Эрдэнэ, Д.Балдан-Очир гишүүд рүү салаавч гаргаж багагүй шуугиан тарьсан юм. Тэгвэл дараагийн ээлжит салаавч гаргасан гишүүн бол Ц.Шинэбаяр. Тэрээр 2012 оны дөрөвдүгээр сарын 13-нд МАХН-ын дарга Н.Энхбаярыг баривчлах үеэр тусгай албаны ажилтнууд руу салаавч гаргасныг ард түмэн мартаагүй ээ. Дараагийн ээлжит салаавчийн эзэн бол Д.Оюунхорол гишүүн юм. Тэрбээр 2012 оны дөрөвдүгээр сарын 26-ны өдөр TV5 телевизийн Ерөнхий зөвлөх байсан Д.Сарангэрэлтэй нам дотроо хэн нь лидер эмэгтэй вэ гэдэг асуудлаас үүдэлтэйгээр хэрэлдэж, бие бие рүүгээ салаавч гаргасныг мөн адил ойр хавийн хүмүүс нь гэрчилсэн билээ. Энэ мэт гишүүдийн балчимгүй явдлыг тоочоод байвал дуусашгүй бололтой.  Хамгийн сүүлд гэхэд л Сангийн дэд сайд асан Ч.Ганхуяг хэсэг нөхдийн хамт төрийн ордон руу салаавч гаргасан. Гэтэл түүнийг салаавчны шинэ моод дэлгэрүүлсний маргаашнаас нь ам.доллар буурсан учраас Ч.Ганхуяг, Б.Болдсайхан нарын жиргээчдэд хүрэл цом гардуулахаар болсон талаар бор шувуу жиргэлээ. Тэднийг “салаавчаар ам.доллар бууруулсан, сайн эрчүүд” хэмээн нэрийдэж тэдэнд зориулан бүтээсэн цомыг сэтгэл гарган урласан гэнэ шүү.