Монгол найруулагчдын олж харж чадаагүй Бөртэ буюу Ч.Хулангийн тухай...

Оросын кино найруулагч Сергей Бодровын найруулсан  “Монгол” кинонд  Их эзэн Чингис хааны түүх, Монгол Улсын түүхийг хэтэрхий уран сайханчилж, бүдүүлгээр зөрчсөн гэсэн шүүмжлэл ихээр гарч байсан. Харин арилжааны үүднээс нь харвал Холливудын аргаар дэлхийн төвшинд хийсэн, киноны реклам гэж юу болохыг жинхэнэ утгаар нь харуулж, сурталчилсан гэдэг үүднээсээ кино судлаачдаас боломжийн үнэлгээ авсан. Тэгвэл тус киног бүтээхэд 12 улсын жүжигчид оролцсон бөгөөд  80 дахь удаагийн Оскарын кино наадмын  гадаад хэл дээрх хамгийн шилдэг кино номинацид нэр дэвшиж  байсан билээ. Тус киноны  хоёрдугаар ангийн зураг авалт энэ  2013 онд эхлэнэ гэгдэж байсан ч, одоогоор албан ёсны мэдээлэл нь байхгүй байгаа. Ямартаа ч  Сергей Бодров “Монгол” киноны нэгдүгээр ангид тоглосон жүжигчдээ дахин цуглуулж эхэлсэн гэх мэдээлэл гараад байсан юм.

Мэдээж Бөртэ хатны дүрд тоглосон Чулууны Хуланг шинэ ангид нь  дахин тоглох болов уу гэсэн хүлээлт Монголчуудад бий. Бидний түүхийг өгүүлсэн тус кино бүтээгдсэн даруйдаа дэлхийн төвшинд яригдаж, анхаарлыг татсан билээ. Тэрчлэн Ч.Хуланг уншигчдадаа илүү дэлгэрэнгүй танилцуулж байна.

- 1985 онд Өвөрхангай аймгийн Хархорин суманд төрсөн Чулууны Хулан хоёр эгчтэй, айлын бага охин. Түүний аав  жолооны багш мэргэжилтэй,  ээж нь инженер мэргэжилтэй хүн аж.

-Тэрээр бага ангид  байхдаа уран нугаралтаар чармайн хичээллэдэг, ер нь л спортод дуртай охин байж. Гар бөмбөг, сагсан бөмбөг, таеквондо гээд хэд хэдэн спортын төрлөөр хичээллэж байсан гэсэн. Харин одоо бол иог, усанд сэлэлтээр хичээллэж байгаа юм билээ.  Монгол нутгийн охин тэрээр байгальд хайртай. Ан амьтанд хайртай. Тэрдундаа  морь,  нохойнд их хайртай, аялал зугаалгаар явах, байгалийн сайхныг бишрэх дуртай аж. Мөн Ч.Хулан гадаад хэл сурах сонирхолтой гэсэн. Тэр одоогоор  орос , англи,  казах хэл сураад байгаа юм билээ.

-Түүнийг Сергей Бодровын “Монгол”  кинонд тоглосны дараа найруулагч Доржийн Золбаяр хэвлэлд ярилцлага өгөхдөө “... Ийм гайхалтай төрхтэй эмэгтэйг монголын найруулагчид өөрсдийнхөө бүтээх  “Чингис”-ийн Бөртэ-д тоглуулж чадсангүй алдчихлаа...” хэмээн харамсангуй өгүүлсэн байдаг юм.

- “Монгол” уран сайхны киноны зураг авалт  2005-2007 оны хооронд үргэлжилсэн байдаг.  “Eurasia”, “CTB”, Andrey’s banner”, “X-Filme Creative Pool” “Kinofabrika Gmbh”, “Picturehouse” film компаниудын хамтын бүтээл болох тус киноны  хэсэг уран бүтээлчид Бөртэ хатны дүрд тоглох жүжигчнийг хайн монголд ирээд хэд хэдэн эмэгтэйг пробонд оруулсан юм билээ. Гэсэн ч  ерөнхий болоод хоёрдугаар найруулагчийн сонголтод нийцэх дүр төрхтэй эмэгтэй байхгүй байж. Гэхдээ тэд хайж байсан хүнээ олсон. Ч.Хулан киноны уран бүтээлчидтэй санаандгүй байдлаар тааралдаж, тэд түүнийг харсан даруйдаа танилцах хүсэлт тавьж, улмаар пробонд орох санал тавьжээ. Ч.Хулан тэр үед монголдоо сэтгүүлзүйн чиглэлээр суралцдаг байсан бөгөөд пробонд тэнцсэнээр “Монгол”-д тоглох боломж нь бүрэн нээгджээ. Тэрээр мэргэжлийн жүжигчин биш учраас 2006 онд  Москва хотод Ксения Громова багштай жүжигчний курст суралцсан байдаг.

- Ч.Хулан зөвхөн жүжигчин биш. Найруулагч болохоор шамдаж байгаа юм билээ. Тэр 2008-2009 онд  “Cinema Hotel Corporation” компани, найруулагч Ануар Райбае-ын “ Лаве” кинонд найруулагчийн туслахаар ажилласан бол 2010 онд  “Kazakhfilm” & “Alemstudio”  компаниудын хамтарсан, найруулагч Асиа Сулеева болон Ануар Райбае-ын “Женіс семсері” кинонд найруулагчийн туслахаар ажиллажээ. Мөн  “Kazakhfilm” & “Office 111-t” film компаниудын хамтарсан, найруулагч Ермек Турсунов-н “Далады дары із” кинонд найруулагчийн туслахаар ажилласан байна.

-Ч.Хулан одоо Казахстаны Астана хотод амьдарч байгаа бөгөөд “Монгол” кинонд туслах  найруулагчаар ажилласан Naryn Igilik хэмээх Казахстаны найруулагч залуутай гэр бүлийн амьдрал зохиосон юм.