Б.Гарамгайбаатар, Н.Батбаяр нар эрх мэдэлтнүүдийг ХӨЛДӨӨ ЧИРЭХ ҮҮ

Авлигатай тэмцэх газраас өнгөрөгч сарын 21-ний орой УИХ-ын гишүүн асан Б.Гарамгайбаатар, Эдийн засгийн хөгжлийн сайд асан Н.Батбаяр нарыг прокурорын тогтоолоор 461-р ангид цагдан хорьсон.

-Б.Гарамгайбаатарыг нотлох баримтанд тулгуурлан яллагдагчаар татжээ-

УИХ-ын гишүүн асан Б.Гарамгайбаатарыг Халзан бүргэдэй-Солонготын давааны чиглэлийн 100 километр авто замын гүйцэтгэл 38 орчим хувьтай байхад тухайн газарт дахин шинээр зам тавих ойлголтыг Засгийн газарт өгч Хөгжлийн банкнаас нэмж нийт 46.3 тэрбум төгрөг гаргуулж аваад “Монроуд” компанид шууд шилжүүлж өгсөн хэрэгт буруутгаж буй. Үүнтэй холбогдуулан түүний хүү "Монроуд" компанийн захирал Г.Тэнгис, тус компанийн нягтлан бодогч Б.Гарамгайбаатарын төрсөн дүү Б.Оюунцэцэг нарыг шалгаж байгаа юм. Гэвч уржигдар орой /2017.03.07/ 18.00 цагийн орчимд нийслэлийн Прокуророос санал гаргаж, сэжигтнээр татагдсан Б.Гарамгайбаатарыг суллах эсэхийг шийдэх Сүхбаатар дүүргийн эрүүгийн хэргийн анхан шатны шүүх хурал болжээ.

Нийслэлийн Прокуророос Б.Гарамгайбаатарыг эрүүл мэндийн шалтгааны улмаас суллах саналыг шүүгч Х.Идэрт ирүүлсэн байна. Улмаар шүүх саналыг хэлэлцээд, Б.Гарамгайбаатарыг батлан даалтад гаргасан тухай Сүхбаатар дүүргийн эрүүгийн хэргийн анхан шатны шүүхийн хэвлэлийн төлөөлөгч н.Баяржаргал мэдээллээ.

Түүнийг сулласан ч Эрүүгийн хуулийн тусгай ангийн 150.3, 263.2-т зааснаар эрүүгийн хэрэг үүсгэн шалгаж буй юм.  

Албаны эх сурвалжийн мэдээлснээр Замын-Үүд боомтын шалган нэвтрэх цогцолборт 8.7 км автозамыг 20 тэрбумаар барьж болох ТЭЗҮ гарсан байхад 33 тэрбум төгрөг болгон нэмж Хятадын хөрөнгө оруулалттай компанид уг санхүүжилтийг олгожээ. Дээрх хоёр шийдвэр хоёулаа Засгийн газрын нэг хуралдаанаар зэрэг гарсан нь сэжиг бүхий байгаа тухай хуулийнхан онцлон ярьсан. АТГ-аас түүнийг үргэлжлүүлэн хорих саналтай байгаагаа прокурорт хүргүүлсэн ч шүүхээс дээрх шийдвэрийг гаргасан аж. Гэхдээ “Шаардлагатай гэвэл түүнийг үргэлжлүүлэн хорих саналыг шүүхэд дахин гаргах учраас хэргийн нөхцөл байдалтай уялдуулан тодорхой шийдэлд хүрнэ” хэмээсэн юм.

Б.ГАРАМГАЙБААТАР ДАХИН МУЛТРАХ УУ

“Монроуд” компанитай холбоотой луйврын хэрэг түүнийг гишүүн байхаас үүдэлтэй. АТГ 2014 оноос шалгаж эхлэсэн ч тухайн үед Ардчилсан нам засаг барьж байсан учир түүнд холбоотой хэргийг хав дарсаар иржээ. Солонготын даваа-Халзанбүргэдэй чиглэлийн авто замын ажлаас гадна “Монроуд” компани Хэнтий аймгийн Жаргалтхаан сумын нутагт орших Дуутын даваанаас Мөрөн сум хүртэлх 50 км урт, хатуу хучилттай замын ажлыг ч хийж байв.

Харамсалтай нь одоо болтол тус замаас болж аваар осол гарч, жолооч нар аргаа барсаар байна. Тууз хайчилж, Улаанбаатараас Ерөнхий сайд хүртэл ирж нээж байсан тус зам хэдхэн сарын дараа борооны усанд цохигдож хагарснаар чанар нь танигдсан. Гэвч түүний энэхүү хариуцлагагүй байдлыг одоо болтол хэн ч хэлэлцэхгүй байгаа нь хачирхалтай. Ямартай ч түүний барьсан замыг дахин засахаар улсаас 4,3 тэрбум төгрөг төсөвлөсөн тухай яриа чих дэлсэв. 2016 оны сонгуульд Хэнтий аймгийн 41-р тойрогт өвдөг шороодсон нь түүний чанаргүй зам барьсны гай гэж хэлэхэд хилсдсэн болохгүй биз ээ.

Хэрэв АТГ Б.Гарамгайбаатарыг дахин хорих саналтай байгаагаа прокурорт илэрхийлбэл тус газраас хүсэлтийг нь хянаж үзээд шүүх рүү шилжүүлбэл дахин таслан сэргийлэх арга хэмжээ авах шүүх хурал болох юм байна.

ӨМНӨХ ЗАСГИЙН ГАЗРЫН НӨЛӨӨ БҮХИЙ АЛБАН ТУШААЛТНУУДЫГ ШАЛГАЖ ЭХЛЭХ ҮҮ 

тухайн үед Чингис бондыг олон улсын зах зээлд гаргах, мөнгө олж ирэх бүхий л ажлыг Эдийн засгийн хөгжлийн сайд асан Н.Батбаяр, Хөгжлийн банкны гүйцэтгэх захирал асан Н.Мөнхбат нар хариуцаж байсан. “Фортуна” Н.Батбаярыг Эрүүгийн хуулийн тусгай ангийн 263 дугаар зүйлийн 263.2, 264 дүгээр зүйлийн 264.2,150 дугаар зүйлийн 150.3-т зааснаар сэжигтнээр тооцон шалгаж байгаа юм.

Ямартай ч түүнийг сэжигтнээр тооцон 14 хоног цагдан хорьсон ч Сүхбаатар дүүргийн эрүүгийн хэргийн анхан шатны шүүхээс биеийн байдлыг нь харгалзан үзэж мөн л батлан даалтад гаргасан юм. Энэ хэрэгт холбогдуулан Хөгжлийн банкны захирал асан Н.Мөнхбатыг шалгаж байгаа ч түүнд дахин таслан сэргийлэх арга хэмжээ авч магадгүй гэдгийг албаны эх сурвалж мэдээллээ. Өөрөөр хэлбэл, Н.Батбаярыг яллагдагчаар татсан тохиолдолд Н.Мөнхбатыг цагдан хорьж болзошгүй гэсэн үг юм.

Тэгэхээр эл хэрэгт Н.Мөнхбат, Н.Батбаяр, Б.Гарамгайбаатар нараас гадна тухайн үед Засгийн газарт ажиллаж байсан шийдвэр гаргасан эрх мэдэл бүхий хэд, хэдэн албан тушаалтнуудыг сэжигтнээр татан шалгаж магадгүй байна.

Өөрөөр хэлбэл, 46.3 тэрбум төгрөгийг бондын мөнгөнөөс гаргаж өгсөн хүмүүс нь бидний сайн мэдэх эрх мэдэл бүхий албан тушаалтнууд. Угтаа бол Б.Гарамгайбаатар нь тухайн үед УИХ дахь Эдийн засгийн байнгын хорооны даргаар ажиллаж байсан учраас “Чингис” бондын хөрөнгөөр санхүүжүүлэх төсөл хөтөлбөрүүд уг байнгын хороогоор хэлэлцэгдэж шийдвэр гаргах эрх бүхий албан тушаалтнуудтай зөвшилцсөний улмаас дээрх мөнгийг Засгийн газраас авсан гэж үзэж буй юм.

Тэд улсад их хэмжээний хохирол учруулсан нь тогтоогдвол хариуцлагаа хүлээх хэрэгтэй. Мөн Эдийн засгийн байнгын хорооны дарга, Эдийн засгийн хөгжлийн сайд асан нарт холбоотой хэрэг энэ мэт хүрээгээ тэлвэл тухайн үеийн засгийн эрх барьж байсан өндөр албан тушаалтнуудыг ч шалгаж болзошгүй аж.

Б.Энх-Уянга

www.zindaa.mn