Италичууд сэргээгдэх эрчим хүчний чиглэлд хамтран ажиллах сонирхлоо илэрхийллээ

Эрчим хүчний сайд П.Ганхүү Италийн эдийн засгийн хөгжлийн яамны дэд сайд Иван Скалфороттог /2017.04.07/ хүлээн авч уулзлаа. Ноён Иван Скалфоротто “Итали улс малын хаягдал түүхий эд ашиглан эрчим хүч үйлдвэрлэдэг бөгөөд энэ чиглэлд Монгол улстай хамтран ажиллах сонирхолтой байна. Манай оронд дэвшилтэт технологи нь нутагшсан, харин танайд түүхий эд элбэг учраас хамтран ажиллах боломжтой юм. Мөн манай улс дэрс, хогийн ургамал зэргийг ашиглаж эрчим хүч гарган авах судалгааны ажил хийж байгаа” гээд Итали орон сэргээгдэх эрчим хүчний салбарт томоохон үйлдвэрлэгч болохыг онцоллоо.

Эрчим хүчний сайд П.Ганхүү “Монгол, Италийн харилцаа эрчим хүчний салбарын хамтын ажиллагаагаар өргөжин тэлнэ гэдэгт итгэлтэй байна. Та бүхний танилцуулсан эрчим хүчний шинэ технологийг судалж, техник, удирдлагын ажлын хэсэг байгуулж ажиллах саналыг тань дэмжиж байна” гэв.

Италийн эдийн засгийн хөгжлийн яамны дэд сайд Иван Скалфоротто Итали, Монголын Засгийн газар хоорондын холимог комиссын Италийн хэсгийн дарга бөгөөд энэ өдрүүдэд Улаанбаатар хотноо комиссын II хуралдаан зохион байгуулагдаж буй юм.