Монголчуудыг дэлхий “Хуц” гэв -1

Нэр хугарахаар яс хугар!

Нэр хугарахаар яс хугар! Энэ бол өвөг дээдэс маань их л бодож, тунгааж, олон дахин хэмжин байж тогтоосон цэцэн үг болов уу. Нэр төрөө алдвал юу болж дуусдаг гашуун жишээ сургамж ертөнцөөр дүүрэн. Итгэл алдвал юу болж дуусаж байгаа гашуун жишээ өнөөгийн бидний үе, Монголд нэн хамаатай.

“Эрдэнэт” үйлдвэртэй холбоотой УИХ-аас гаргасан шийдвэртэй холбогдуулан олон улсын хэвлэл мэдээллийн хэрэгслээр цацагдсан мэдээлэл гэж хэдэн зуугаар тоологдох хэдэн арван хуудас цаас байна. Бид дотооддоо эх оронч хийрхэлдээ хөтлөгдөн ямар ч шийдвэр өлхөн гаргаж болно. Гаргасаар ч ирсэн. Гаднын хөрөнгө оруулалтгүй, гадаад түншгүй бол ямар ч үйлдвэр, завод, аж ахуйн нэгжийн хувьчлалыг зогсоочиход гарзгүй ба нэхэл буухгүй.

Тэгвэл “Нэр хугарахаар яс хугар!” гэдгийг би гадаадын хөрөнгө оруулалттай, гадаад түнштэй бүх үйлдвэр, компани, эсвэл худалдаа, эдийн засгийн хамтын ажиллагаа, хөрөнгө оруулалт руу бүхэлд нь татан авчирч, өгүүлбэр холбон шүүмжлэх гэж байна.

Гадаад харилцааны яам, Төрийн гурван өндөрлөг, ялангуяа, Ерөнхийлөгч гадаад бодлого дээрээ прогрессоор ажиллан ямагт дэвшил авчирч ирсэн гэдгийг би дахинтаа тэмдэглэе. Хөгжил дэвшилд хэрэгтэй, гадаад таатай нөхцөл бүрдүүлэн, гадаад түншүүдийг нь олоод ирлээ, түүнд нь улс төрийн аятай таатай уур амьсгалыг нь бүрдүүлээд өглөө. Яг хамтран ажиллаад, хөрөнгийг нь татан дуудаад оруулаад ирэх гэтэл бизнес, худалдаа, арилжаа хийдэг нөхөд нь санхүүгийн сахилга зөрчих, үрэлгэн ажиллах, худал амлах, олон түншийг мөргөлдүүлэх, иргэний хөдөлгөөнөөр дарамтлуулах гэхчлэн Монголын нэр төрд сэв суулгасан алхмыг хийж өгөх юм. Ингээд нэр хугарлаа. Итгэл алдсан монгол түншид дахин хэн итгэж, хөрөнгөө оруулж, мөнгөө зээлүүлэх вэ? Ийм л гачлан Монголын гадаад бодлогыг 27 жил сүүдэр шиг дагалаа.

Одоо “Эрдэнэт”-ээс болоод Монголын нэр хүндийн уналт эрчээрээ явж өглөө. Associated рress агентлагийн мэдээллийн сайт дотор “Mongolia Nationalizes Mine, Prompts Warning on Investor” гэсэн гарчиг бүхий нэг ноцтой мэдээ цохиж явна. Хөрвүүлбэл, “Монгол Улс уурхайг нийгэмчилж, хөрөнгө оруулагчдад сэрэмжлүүлэг болголоо”. Иймэрхүү агуулга бүхий мэдээ нийтлэл олон улсын 80 гаруй цахим хуудсаар гарсан тооцоо байна. Эдгээрээс хамгийн олон уншигч дагуулсан нь The New York Times сонины электрон хувилбар дахь нийтлэл байх юм. The New York Times сонины нийтлэлийн агуулгыг товчилбол дараах үндсэн санаа цухалзана.

Монголын хууль тогтоогч нар хувийн компанийн худалдан авсан хөрөнгийг хураах чиглэл Засгийн газартаа өглөө.

Коммунизм 1990 онд нуран унаснаас хойш анх удаа хууль тогтоогч нар нийгэмчлэх шийдвэр гаргалаа.

Өмнө нь “Оюутолгой”-той холбоотой маргаан үүсэж байсан ч шийдэгдэж нэг талдаа гарсан юмсан.

Хэдийгээр хэлцэлтэй холбоотой асуудлыг шалгах ёстой ч парламентын энэ шийдвэр нь өмчийн эрхэнд аюул учруулж байна хэмээн судлаач де- факто Жаргалсайхан онцлон тэмдэглэв.

Монголын Худалдаа хөгжлийн банк болон хэлцэлд оролцсон “Монголын зэс” корпораци албан ёсны байр сууриа мэйлээр болон утсаар илэрхийлсэн, парламент болон Засгийн газраас тайлбар авах гэсэн боловч холбогдож чадаагүй. Монгол Улс буцаад коммунизм руугаа гулган орж байна уу гэсэн асуултыг хөрөнгө оруулагчид тавьж эхэллээ. Олон улсад зөвхөн итгэж байгаа талтайгаа л бизнесийн харилцаанд ордог. Харин нэр хүндээ алдсан нөхдөөс ямагт зайлсхийдэг гэжээ.

Эх орон, ард түмний төлөө УИХ-д олонхоороо санал хураагаад дотооддоо асуудлаа шийдчихлээ хэмээн бидний ойлгосныг барууны нөлөө бүхий сонинд ингэж бичдэг юм байна.

АНУ ба дэлхий дахинд “Mongolian Parliament Votes to Nationalize Erdenet Copper Mine” буюу “Монгол Улсын парламент Эрдэнэт зэсийн уурхайг нийгэмчлэхээр боллоо” гэсэн гарчигтай нийтлэл УИХ- ын шийдвэр гарсан тэр орой шөнийн 02.00 цагт Bloomberg- ийн бүх сүлжээгээр цацагджээ.

» Одоо "Эрдэнэт"-ээс болоод Монголын нэр хүндийн уналт эрчээрээ явж өглөө.

» Монгол Улс буцаад коммунизм руугаа гулган орж байна уу гэсэн асуултыг хөрөнгө оруулагчид тавьж эхэллээ.

» Коммунизм 1990 онд нуран унаснаас хойш анх удаа хууль тогтоогч нар нийгэмчлэх шийдвэр гаргалаа.

Тэд юу гэж бичсэн бэ? Агуулгын хувьд дараах үндсэн асуудлыг хөнджээ.

Монгол Улсын парламент Монгол Улсын томд тооцогдох зэсийн уурхайгаа нийгэмчлэх тогтоол баталлаа. Парламент өмнөх Засгийн газрын үед байгуулсан гэрээг цуцаллаа.

Парламентын ажлын хэсэг хэлцэлтэй холбоотой хууль бус үйл ажиллагаа байсныг тогтоолоо. Худалдаа хөгжлийн банк болон хэлцэлд оролцсон “Монголын зэс” корпораци албан ёсны байр сууриа имэйлээр болон утсаар илэрхийлж, парламент болон Засгийн газраас тайлбар авах гэсэн боловч холбогдож чадаагүй. Энд би бүгдийг хөрвүүлж тоймлох арга алга. Дараах линкүүдээр ороод нээгээд үзвэл дээрхийн адил Монголд чинь хонины арьс нөмөрсөн чононууд гадаадын хөрөнгө оруулагчдыг отоод сууж байдаг, тэд нь коммунист чононууд, хувийн өмчийг үзэж чаддаггүй. Монголд ардчилал хөгжөөд 27 жил болж байгаа ч эдийн засгийн ардчилал гэж алга, монголчуудад итгэх арга алга гэсэн санаа хааяагүй цухалзана.

Монгол Улс буцаад коммунизм руугаа гулган орж байна уу гэсэн асуултыг тавьж эхэллээ