Ард нийтийн санал асуулгыг Ерөнхийлөгчийн сонгуультай хамт явуулна

 УИХ-ын өчигдөрийн нэгдсэн чуулганаар Ард нийтийн санал асуулгын тухай хуульд өөрчлөлт оруулах тухай хуулийн төслийн үзэл баримтлалыг хэлэлцэх нь зүйтэй гэсэн саналын томъёоллоор санал хураахад хуралдаанд оролцсон гишүүдийн 69,4 хувь нь дэмжсэн. Засгийн газрын Хэрэг эрхлэх газрын дарга Ж.Мөнхбатын мэдээлснээр, “Ард нийтийн санал асуулгыг 06 дугаар сарын 05-нд товлон зарлаад, Монгол Улсын Ерөнхийлөгчийн 2017 оны ээлжит сонгууль  хүртлэх 25 хоногийн хугацаанд бэлтгэл ажил, иргэдийг мэдээллээр хангах боломжтой гэж Засгийн газар тооцсон. Ард нийтийн санал асуулга явуулахад 30 тэрбум төгрөг шаардлагатай байгаа. Иймд Монгол Улсын эдийн засгийн нөхцөл байдал хүнд байгаа учраас 30 тэрбум төгрөг хэмнэж,  Монгол Улсын Ерөнхийлөгийн сонгуультай хамтатган явуулахаар болсон ” гэж мэдэгдээд байна.

  Үндсэн хуульд өөрчлөлт оруулах асуудлаар Ард нийтийн санал асуулгыг Ерөнхийлөгчийн сонгуультай хамт явуулахаар Засгийн газраас санаачилж байгаад УИХ-ын зарим гишүүд эсэргүүцэж байгаа юм. Сонгуультай хамт явуулах нь сонгуулийн үйл явцал сөрөг үр дагавартай гэж үзэх гишүүд байна.

Т.Түвшин