УИХ-ын дарга М.Энхболд огцрох уу

 Монгол Улсын Ерөнхий сайдыг огцруулах асуудлыг УИХ дахь МАН-ын 30 гишүүн өргөн барьсан. Энэ асуудлыг хэлэлцэж шийдвэрлэх хуулийн хугацаа өчигдөр дуусгавар боллоо. Тодруулбал, Үндсэн хуулийн 43 дугаар зүйлийн 3-т “Улсын Их Хурал Засгийн газрыг огцруулах тухай өөрөө санаачилсан болон Ерөнхийлөгчийн санал, Ерөнхий сайдын мэдэгдлийг хүлээн авснаас хойш арван тав хоногийн дотор Засгийн газрыг огцруулах эсэхийг хэлэлцэн шийдвэрлэнэ” гэсэн заалтыг УИХ-ынд дарга зөрчөөд байна.

МАН-ын Бүлгийн дарга Д.Хаянхярваа нь Ерөнхий сайдыг огцруулах саналд огт дурдагдаагүй буюу “Шадар сайдыг тагнаж чагнасан” асуудлаар бүлэг завсарлага авах санал гаргасныг УИХ-ын дарга М.Энхболд хүлээн авсан юм. Ингэснээр УИХ-ын Дэгийн тухай хууль болон Монгол Улсын Үндсэн хуулийг УИХ-ын дарга зөрчжээ.

Энэ асуудлаар намынх нь гишүүд болон АН-ын бүлгээс өчигдөр тэр даруй мэдэгдэл хүргүүлсэн. УИХ-ын гишүүн Т.Аюурсайхан албан тоотдоо “Ерөнхий сайдыг огцруулах асуудлыг хэлэлцэж шийдвэрлэх хуулийн хугацаа 2017 оны есдүгээр сарын 06-ны өдрөөр дуусгавар болж байхад УИХ-ын нэр бүхий 30 гишүүний өргөн барьсан саналд огт дурдагдаагүй буюу “Шадар сайдыг тагнаж чагнасан” асуудлыг Бүлгийн нэгдсэн шийдвэрээр бус Бүлгийн саналын дагуу Аюулгүй байдлын байнгын хороо болон Тусгай хяналтын дэд хороогоор хэлэлцүүлэхээр завсарлага өгсөн Таны үйлдэл нь Монгол Улсын Их хурлын чуулганы Дэгийн тухай хуулийн 4 дүгээр зүйлийн 4.6, 38 дугаар зүйлийн 38.2 дахь хэсэг, Монгол Улсын Их хурлын тухай хуулийн 16 дугаар зүйлийн 16.5, 27 дугаар зүйлийн 27.4 дэх заалтыг шууд зөрчсөн үйлдэл боллоо” гэсэн юм. 

    Мөн УИХ дахь Ардчилсан намын бүлгийн дарга Д.Эрдэнэбат “Хэрэв хуулийн хугацаанд Засгийн газрыг огцруулах эсэх асуудлыг хэлэлцэн шийдвэрлэж чадахгүйд хүрвэл Үндсэн хууль зөрчсөн үйлдэл болно. Тиймээс УИХ дахь Ардчилсан намын бүлгээс УИХ-ын даргад хариуцлага тооцох нөхцөл үүсч болзошгүй байна” гэж өчигдөр анхааруулсан. Иймд Үндсэн хууль болон УИХ-ын тухай хууль, Дэгийн тухай хуулийг зөрчсөн УИХ-ын дарга М.Энхболдод парламент хариуцлага тооцож магадгүй байна. АН-ын бүлгийн зүгээс ч албан тоотдоо дурдсанаар Үндсэн хууль зөрсөн тохиолдолд “...хариуцлага тооцох нөхцөл үүсч болзошгүй” хэмээн онцолжээ.

Ийм байдал үүссэн учраас АН-ын бүлэг УИХ-ын дарга М.Энхболдод хариуцлага тооцох асуудлыг тавих нь мэдээж юм. Удахгүй эхлэх намрын чуулганаар УИХ-ын даргын Үндсэн хууль болон бусад хуулийг зөрчсөн асуудлыг хэлэлцэх нь. МАН-ын бүлгийн 65 гишүүн хоёр хуваагдсан. М.Энхболд, Ж.Эрдэнэбат нарын эсрэг 30 гаруй гишүүн зогсож буй юм. Засгийн газрыг огцруулаад зогсохгүй УИХ-ын дарга ч хууль зөрчсөн хариуцлага хүлээж огцрох байдал үүсч байна. Намынх нь 30 гишүүн дээр нэмэгдэж АН-ын бүлгийн гишүүд хариуцлага тооцох асуудалд санал нэгдсэнээр түүнийг спикерийн сэнтийгээс буулгах боломжтой юм. М.Энхболдыг албан тушаалаас нь буулгаж, оронд очих сонирхолтой хуучин “кадр”-ууд ч байгаа. Тиймээс намынх нь гишүүдээс түүнийг огцруулахыг дэмжих гишүүд цөөнгүй бий.

Түүнчлэн УИХ-ын даргыг хууль зөрчсөнтэй холбоотойгоор огцруулж байсан туршлага өмнө нь байдаг. УИХ-ын даргаар 2007 онд ажиллаж байсан Ц.Нямдоржийг “хууль зассан” асуудлаар огцруулж байсан юм. Үүнтэй адил зөрчлийг УИХ-ын дарга М.Энхболд үйлдээд байна. Засгийн газраа авч үлдэх гэсэн оролдлого нь өөрөө хууль зөрчихөд хүргэв бололтой.

Т.Амараа

ZINDAA.MN