МАН-ын даргад горилогчид

Төрийг эрх барьж буй МАН-ын сүүлийн дотоод марафон болоход 20 хоног үлдээд байна. Өнгөрөгч есдүгээр сарын 25 нд тус намын эхний марафон болж, Бага хурлаараа шөнө дөл хүртэл хуралдсаны эцэст  Ерөнхий сайдаа тодруулсан билээ. Ийнхүү УИХ-дахь бүдүүн бүлгийн Засаг шинээр бүрэлдэн тогтоод хэдэнтээ хонож байна.

Үүнээс өмнө У.Хүрэлсүхийн танхимд орж ажиллах сайд нарыг тодруулахын тулд чамгүй бялуу хуваарилалт болж  бүдүүн  бүлгийн гишүүн бүр том, жижиг бялуу хүртэхийг санаархсан  өдөр хоногууд өнгөрөв.

 Харин одоо нэгэнт бялуу хуваарилалт дууссан учир тэд  намын дараагийн марафондоо бэлдэхийн сацуу сойх унаагаа ч зэхсэн сурагтай.  Тодруулбал, МАН-ын Их хурал 2017 оны 11 сарын сарын 20-21-ний өдрүүдэд болно. Тус Их хурлаар М.Энхболд намын даргын албан тушаалаа өгөх учир түүний албан тушаалд очихыг санаархсан нөхөд МАН-ын гишүүд дотор цөөнгүй байна. "Дур эзнээ голохгүй дунд чөмөг сүүжээ голохгүй”хойно доо. 

МАН-ын дарга болох горилогчдын тэргүүн эгнээнд Ерөнхий сайд У.Хүрэлсүх явж буй. Түүний хувьд Ерөнхий сайд болсон учраас  намын даргын албаа хамт хийхийг хүсэж байгаа нь мэдээж. Ингэж ч байж ч илүү бат бөх болох нь дамжиггүй.

Тэгвэл удаах горилогчдод Ерөнхий сайд асан Ж.Эрдэнэбатын нэр дуулдаж байгаа юм. Гэвч улс төрийн рейтинг нь уруудаж байгаа учир гишүүд нь түүнийг дэмжих эсэх нь эргэлзээтэй л юм.

Харин гуравдагч горилогчийн тухайд харьцангүй залуу боловсон хүчин болох намынхаа залуу үеийн төлөөлөл Н.Дэмбэрэлийн нэр чих дэлсгэв. Түүний хувьд МАН-ын Ерөнхий нарийн бичгийн дарга Д.Амарбаясгалангийн зөвлөхөөс гадна  МАН-ын хэвлэл мэдээллийг олон жил хариуцаж байсан аж. Магадгүй  намдаа шинэ үеийн  шинэчлэлийн салхи сэвэлзүүлэхийг хүсэгчдэд Н.Дэмбэрэлийг сонгох шалтгаан болж магадгүй юм.

Ямартай ч одоогийн байдлаар  МАН-ын даргад өрсөлдөхөөр дээрх гурван хүний нэр ил болоод байна.   Цаашид хэд нэмэгдэхийг хэлж мэдэхгүй. Арваннэгдүгээр сарын 20 болтол зай ч байна, лай ч байна.

Ш.Адъяамаа