Ерөнхийлөгчийн ”экс” эхнэр намын удирдлагад багтаж, ИЗНН-ыг сэрээнэ

•  

Өнөөгийн "Иргэний зориг, Ногоон нам"-ын суурь болсон ИЗН-ыг анх 1998 онд С.Баяр нар АН-ын блокыг хуваах зорилгоор байгуулсан гэгддэг. Харин одоо С.Баяр нарын хуучин кадрууд улстөрөөс хөндийрч, Ерөнхийлөгч Х.Баттулга болон АН-ынхан ИЗН-ын үйл ажиллагааг идэвэхжүүлэхийг зорьж байна гэх шум гарч эхэллээ. Унтаа байсан намыг ийнхүү сэрээхийн учир нь МАН-ын эсрэг ажиллагаанд нэгдмэл байдалтайгаар оролцохоор шуударсан гэх... Энэ ч үнэний ортой бололтой.

Тодруулбал, ИЗНН-ын үндэсний хороо саяхан хуралдаж, дүрмийн өөрчлөлтөө баталжээ. Энэ үеэр УИХ-ын гишүүн асан С.Оюун намын даргын албаа хүлээлгэн өгч, Ц.Ганхуяг үргэлжлүүлэн намын даргаар ажиллахаар болсон байна. Түүнчлэн Б.Батбаатар, Л.Ганхуяг, Ц.Энхтуяа нарыг ИЗНН-ын дэд даргаар, харин С.Батбаатарыг ерөнхий нарийн бичгийн даргаар сонгожээ.

Энд байгаа хүмүүс АН-аас угшилтай хийгээд, тэдний дотор Ерөнхийлөгч Х.Баттулгын "экс" эхнэр Ц.Энхтуяа байгаа нь дээрх шумын үндэслэл болсон байх талтай. Тэрбээр өдгөө Ерөнхийлөгчөөс тусдаа амьдардагч албан ёсны гэрлэлтийн баталгаатай байгаа, тиймдээ ч  Ерөнхийлөгчийн бодлого, шийдвэрийг шүүмжлэхээс илүүтэй дэмжинэ гэх таамгийг төрүүлж буй юм.

Тэрбээр ИЗНН-ыг байгуулагдсан цагаас нь хойш үйл ажиллагаанд нь идэвхтэй оролцож, санхүүжилтэд нь дэмжлэг үзүүлж ирсэн гэгддэг.

Д.Тамир

WWW.ZINDAA.MN