Ч.Хүрэлбаатар: Засгийн газар дээр ”Эрдэнэт”-тэй холбоотой ямар ч маргаан болоогүй

УИХ-ын ээлжит чуулган хуралдаж байна. Засгийн газар татварын тухай гурван хуулинд өөрчлөлт оруулахаар ажиллаж байгаа аж. Энэ хүрээнд долоон төрлийн татварыг нэмэгдүүлсэн шийдвэрийг цуцлах Засгийн газрын саналыг УИХ-аар хэлэлцэж байна. Ингээд зарим гишүүдийн асуулт, хариултыг хүргэе.

УИХ-ын гишүүн О.Баасанхүү:

Би АН-ын тавьж буй зарим шаардлагыг дэмжиж байна. Дарга нарын тансаглалыг ард түмний татварын мөнгөөр төлдөгөө боль гэдгийг дэмжиж байгаа. Зарим нь буруу. Нэмэгдсэн татваруудыг бүгдийг цуцал гээд байх юм. Есөн төрлийн татвар дотор чинь архи тамхины татвар байгаа. Энэ татварыг нэмэх нь зөв шүү дээ.

Шатахууны татварыг тэглэлээ гэж Засгийн газар мэдээлсэн. Халамж хавтгайрлаа гэж АН-ынхан шүүмжилж байна. Өөрсдөө болохоор хэдэн тэрбумаар нь цусалж байгаа. Энэ халамж миний ойлгож байгаа болохоор зорилтот бүлгүүдэд очиж байгаа шүү дээ. Тийм учраас үүнийг болиул гээд байгаа нь ямар учиртай юм бэ.

Мөн Эрдэнэтийг битүүмжилчихсэн юм уу. Энэ талаар мэдээлэл өгөөч. Өдөр бүхэн 35 мянган долларын торгууль төлж байгаа гэж яриад байна. Энэ үнэн юм уу, Сангийн сайд аа?

УИХ-ын гишүүн Ч.Хүрэлбаатар:

Шатахууны татварыг УИХ дээр оруулж ирсэн үү гэж асууж байна. А80, А92 шатахуун дээрх татварыг тэглэсэн. Үүнийг УИХ дээр оруулж ирж шийдүүлэх хэрэгтэй юу гэж асууж байх шиг байна. 2008 онд Онцгой албан татварыг хөдөлгөх эрхийг УИХ-ын зүгээс Засгийн газарт өгчихсөн. Тиймд УИХ-аас олгосон эрхийн дагуу шатахууны татварыг тэглэсэн.

Эрдэнэт үйлдвэр арбитрын шүүх дээр маргаантай байгаа. Засгийн газар дээр бол Эрдэнэттэй холбоотой маргаан, хэлцэлд ороогүй. Тиймээс энэ талаар би хариулт өгч мэдэхгүй байна.

Б.Хурцболд