Ч.Сайханбилэг: Эх орноо боддог л юм бол улстөрчид Оюутолгойн асуудалд хутгалдах хэрэггүй

Ерөнхий сайд асан Ч.Сайханбилэг Дубайн гэрээний хэргээр "дээлээ нөмөрч" мэдэхээр болж ирлээ. Учир нь Дубайн гэрээг байгуулах явцад авлига хээл хахууль, албан тушаалын гэмт хэрэг үйлдсэн байж болзошгүй гэж АТГ-аас шалгаж эхэлжээ. Тухайн үед “Эрдэнэс-Монгол” компанийн гүйцэтгэх захирлаар ажиллаж байхдаа Дубайн гэрээнд биечлэн гарын үсэг зурсан Б.Бямбасайханыг АТГ-аас баривчиллаа. Мөн ЗГХЭГ-ын дарга байсан С.Баярцогт, Татварын ерөнхий газрын дарга байсан Б.Ариунсан нарыг ч баривчилж, сэжигтнээр тооцон үргэлжлүүлэн хорих шийдвэр гаргалаа.

Тиймээс энэ хэргийн хамгийн гол сэжигтнээр Ч.Сайханбилэг нэрлэгдэж байгаа нь тодорхой болов. АТГ-аас хийсэн тайлбарт нь энэ тухай шууд дурдсан. Ч.Сайханбилэгээс байцаалт авах шаардлагатай бөгөөд одоогоор гадаадад байгаа гэсэн мэдээллийг өчигдөр АТГ өгсөн билээ.

Дубайн гэрээний хэрэгт Ч.Сайханбилэгээс гадна өөр цөөнгүй хүн ч татагдаж мэднэ. Ч.Сайханбилэг Засгийн газрыг тэргүүлж байхдаа Дубайн гэрээнд гарын үсэг зурахад Монгол Улсын сайд бөгөөд ЗГХЭГ-ын даргаар С.Баярцогт,  Сангийн сайдаар Ж.Эрдэнэбат, Татварын ерөнхий газрын даргаар Б.Ариунсан ажиллаж байсан юм. Тэгвэл ийнхүү асуудал тарьж эхэлсэн Дубайн гэрээг тухайн үед Ч.Сайханбилэг хэрхэн үнэлж, өмгөөлж байсныг уншигчдадаа эргэн сануулъя.

Ерөнхий сайд асан Ч.Сайханбилэг:

-Өнөөдрөөс эхлээд Оюутолгой эдийн засаг болон компани хоорондын асуудал болно. Тиймээс улс эх орноо боддог л юм бол өнөөдөр улстөрчид Оюутолгойн асуудалд хутгалдах шаардлагагүй. Одоо Оюутолгойг зүгээр л орхих хэрэгтэй ийм цаг ирсэн. “Эрдэнэт үйлдвэр”-тэй адилхан Оюутолгой гэдэг ийм том бүтээн байгуулалт, энэ том үйлдвэр маань өөрөө үргэлжлүүлж ажиллах шаардлагатай болсон. Оюутолгойн далд уурхайг эхлүүлэхтэй холбогдуулаад хэд, хэдэн зүйлүүдийг хэлье.  2009 оны хөрөнгө оруулалтын гэрээг хөндөх асуудал аль аль талаасаа тавигдаагүй. Мэдээж аль, аль талд нь хөрөнгө оруулалтын гэрээнд нэмэлт өөрчлөлт оруулах хүсэлт байгаа. Энэ хэлэлцээрийн явцад хөндөгдөөгүй. 2009 оныхоо гэрээг үндэслэж явсан. Далд уурхайг эхлүүлэх үндсэн асуудлуудаа ярилцсан. Хоёр тэрбумын хэтрэлтийн асуудлыг 2009 оны ТЭЗҮ-ээр ярьдаг. Бид аль, аль талаасаа ярьсаар байгаад 1.2 тэрбумын ТЭЗҮ-ийн хэтрэлт дээр удирдлагын зардлын төлбөр төлье, бусад дээр нь төлөхгүй гэдэг дээр хоёр тал тохиролцсон байгаа. Монголын талд ашигтай болсон бас нэг зүйл бол удирдлагын менежментийн зардлыг зургаан хувиар тогтоосон байсан. Үүнийг далд уурхайн бүтээн байгуулалтын үйл явц үргэлжлэх долоон жилийн хугацаанд гурван хувь дээр буулгаж барихаар тохиролцож чадсан. Дараагийн нэг асуудал бол бүх зардлыг Монголын тал хянах бололцоотой болж байгаа. Хоёр талаасаа хоёр, хоёр хүн оруулсан. Монголын талын хүн ахлаад одоо цаашид Оюутолгойн уурхай дээр хийх бүх зардалд хоёр тал болон Монголын Засгийн газар өөрийнхөө хяналтыг тавих бололцоотой болсон. Та бүхэн 53:47 гэсэн тоог байнга сонсож байсан байх. Монголын тал энэ төслийн хуучин 53 хувь, “Рио тинто”-гийн тал 47 хувийг авна гэсэн зарчим өмнө нь ямар нэгэн баримт бичгэн дээр огт засагдаагүй байсан. Одоо бид далд уурхайг эхлүүлэх төлөвлөгөөндөө энэ заалтыг албан ёсоор тусгасан байгаа. Хоёр талаас бүх тооцоонуудаа нэгтгэсэн.

С.Төгөлдөр