М.Энхболд 60 тэрбумын хэргээ хүлээж эхэллээ

Төрийн өндөр албан тушаалыг бандааш, оймс шиг бөөндөж заран, 60 тэрбум төгрөг босгох тухай МАН-ын дарга М.Энхболд, түүний шадар туслахуудын нэг, тухайн үед Нийслэлийн МАН-ын хорооны даргаар ажиллаж байсан Ц.Сандуй нарын хэрэг бүтэн дөрвөн жилийн турш дуулиан шуугиан тарив. Энгийн ард иргэдэд айдас, жихүүдэс, болгоомжлол дагуулсан энэ хэргийг АТГ, Тагнуул, Эрүүгийн цагдаагийнхан шалгасан нэртэй ширээндээ цоожилсоор 4 жил болов.

Төрийн өндөр албан тушаалыг худалдах, төрийн эрхийг хууль бусаар авахыг санаархсан энэ хэргийн араас хөөцөлдөж, хариуцлага нэхсэн цорын ганц хүн бол УИХ-ын гишүүн Л.Оюун-Эрдэнэ. 60 тэрбумын хэрэгт холбогдсон гол сэжигтэн болох М.Энхболдын найз АТГ-ын дарга Х.Энхжаргал  энэ хэргийг шалгасан нэрээр замхруулж, прокурор гэмт хэргийн бүрэлдэхүүнгүй хэмээн хааж, 60 тэрбумын хэргээр шоудаж, Доржзодов гэгч нөхрийг ардын баатар болгон, шударга ёсны төлөө тэмцэнэ хэмээн Ерөнхийлөгчөөр сонгогдсон Х.Баттулга хүртэл нам гүм байхад Л.Оюун-Эрдэнэ ганцаараа тэмцэж, УИХ-ын чуулганы хуралдаанд суухгүй хэмээн мэдэгдэж,  УИХ дээр нээлттэй сонсгол явуулахыг шаардсан. Монгол төрийн түшээд бүгд найр наадам, амралт зугаалга хэсэж, шоронгийн ой тэмдэглэн зарим нь морь мал уралдуулж байхад зуны гурван сар ганцаараа тэмцсэн Л.Оюун-Эрдэнийн тэмцэл үр дүнд хүрлээ.

УИХ-ын дарга М.Энхболдод холбогдох  60 тэрбумын хэргийг прокурор сэргээн шалгахаар болж, МАН-ын Хяналтын хороо энэ хэргийг шалгаж, “Зөвхөн Нийслэлийн албан тушаалын томилгооноос 60 тэрбум төгрөг босгох тухай яриа болсон байна. А.Ганбаатар ийм яриа болсон гэдэг тайлбар өглөө. Тиймээс дээрх хэрэгт нэр холбогдсон  М.Энхболд, Ц.Сандуй, А.Ганбаатар нарт  хариуцлага тооцох шаардлагатай” гэдэг дүгнэлт гаргав.  М.Энхболд  МАН-ын Хяналтын хороонд “Намынхаа нэр хүндийг уг асуудалд холбогдуулсандаа туйлын их харамсаж байна” гэдэг бичиг илгээлээ. Нийслэлийн Ерөнхий  прокурор, хууль цаазын тэргүүн зөвлөх Д.Баярмагнай нь М.Энхболд, Ц.Сундуй, А.Ганбаатар нарт холбогдох  17 0200016 тоот эрүүгийн хэргийг сэргээн шалгахыг  АТГ, ТЕГ, ЭЦГ-ын хамтарсан ажлын хэсэгт даалгав. Ийнхүү нийгэмд үүрлэсэн албан тушаал, хээл хахуулын бэтэг хагарч, М.Энхболд хэргээ хүлээх цаг айсуй. Төрийн өндөр албан тушаалыг наймаалцах гэсэн 60 тэрбумын хэрэг гэдэг хий хоосон зүйл, зохиомол цуурхал, ямар нэг эвлүүлэг байгаагүй юм байна гэдгийг Л.Оюун-Эрдэнэ гаргаж ирж чадлаа.

Хэрэг илэрлээ. Харин үүнийг зохиомол хэрэг гэж хаасан АТГ-ын дарга Х.Энхжаргал, Идэрцогт тэргүүтэй дарга нар, хэргийг хэрэгсэхгүй болгох тогтоол гаргасан Нийслэлийн прокурор Д.Ширэндэв яах вэ? Тэдэнд ямар хариуцлага хүлээлгэх вэ?
 Бүтэн дөрвөн жилийн турш “Энэ бол эвлүүлэг, ийм зүйл болоогүй” хэмээн шударгын дүр эсгэж суусан М.Энхболд, Ц.Сандуй нар яах вэ? Монголын нийгэмд нүүрэлсэн бохир хэргээр шоудаж, Төрийн тэргүүний суудалд заларчихаад энэ хэргийг ор тас мартаж орхисон Х.Баттулга Ерөнхийлөгч, намдаа шударга ёсыг тогтооно хэмээн цээжээ дэлдэж гарч ирсэн хэрнээ нам жим суугаа МАН-ын дарга У.Хүрэлсүх нар хаана байна вэ гээд олон асуудал урган гарч ирж байна.

Ямартай ч хээл хахуульд идэгдэж, буртаглагдаж гүйцсэн нийгэмд шударга ёс гэж байдаг юм шүү гэдгийг жаахан ч гэсэн мэдрүүлсэн Л.Оюун-Эрдэнийг өнөөдөр сошиал орчинд эзэн нь тодорхой бус цахим хуудаснуудаар  “НАМЗХ-ын Ерөнхийлөгчийн суудлаа алдсандаа хорсон, өш зангидаж, М.Энхболдын эсрэг бослоо” хэмээн элдвээр баалж, түүний зүг олон нийтийг турхирч байна. Л.Оюун-Эрдэнэ шаралхсан байна, уу, хорссон байна уу хамаагүй. Гол нь тэр 60 тэрбумын хэргийг дахиад  хууль хяналтын байгууллагын ширээн дээр авчирч, улс төрчдийн захиалгаар ажилладаг, гэмт хэргийг гэмт хэрэг бус болгож, гэмгүй нэгнийг яллаж чаддаг хуульчдын булхайг илчиллээ.

Сүүлийн 27 жилийн түүхэнд төрийн гурван өндөрлөгөөс бичгээр ч бай аль нэг хэлбэрээр харамсаж байгаагаа илэрхийлж, уучлалт гуйсан тохиолдол гарч байсангүй. Тэгвэл Л.Оюун-Эрдэнэ УИХ-ын даргыг уучлалт гуйлгуулж чадлаа.   Бардам, сэхүүн, өөрийнхөө эрх мэдэл, хөрөнгө чинээ, тойрон хүрээлэгч нартаа дулдуйдсан М.Энхболд 60 тэрбумын хэргээ хүлээн зөвшөөрч эхэллээ. Энэ бол эхлэл. Төрийн эрхийг ашиг олох хэрэгсэл, албан тушаалыг арилжаа наймаа гэж харж байгаа  60 тэрбумын хэргийн гэм буруутнууд,  өндөр албан тушаалтнуудад тал засаж, тэдний хэргийг нууж хааж, хэрэгсэхгүй болгож суудаг  АТГ,  Тагнуул, Цагдаа, шүүх, прокурорынхоны мафижсан сүлжээ задрах эхлэл тавигдлаа.  Л.Оюун-Эрдэнэ гишүүнд баярлалаа. Харин битгий шантраарай.