Ц.Нямдорж: Б.Пүрэвдорж оо, чи арай дэндэж байна

УИХ-ын хурлын Хууль зүйн байнгын хорооны өнөөдрийн /2018.10.02/ хуралдаанаар Үндсэн хуулийн цэцийн шийдвэрийг хэлэлцэх үеэр УИХ-ын гишүүн Б.Пүрэвдорж хэлэлцэх асуудалтай холбогдолгүй буюу УИХ дахь МАН-ын бүлгийн гишүүд рүү дайрсан утга бүхий зүйлс хэлсэн юм.

Тодруулбал, “Үндсэн хуулийн цэц үе үеийн эрх баригчдын өнгөн дээр шийдвэр гаргаж ирсэн. Тиймээс Үндсэн хуулийн цэцийн асуудлаар биш шийдвэр гаргах болсон МАН-ын талаар өнөөдөр ярина. 2016 онд Монголын хүн бүр 15 сая төгрөгийн өртэй боллоо гэж хар пиардаж байгаад МАН сонгуульд ялсан. АН-ын Засгийн газар 3.2 тэрбум ам долларын зээл тавьж ямар ажлуудыг хийснийг ард түмэн мэдэж байгаа. Гэтэл өнгөрсөн хоёр жилийн хугацаанд МАН-ын Засгийн газар 3.5 тэрбум ам.долларын зээл нэмж, хүн бүрийг 22 сая төгрөгийн өртэй болгочихоод юу хийсэн юм бэ? Юу ч хийгээгүй. Ховд аймагт юу ч хийгээгүй. Ганцхан ширхэг барилга барьсан нь шоронгийн барилга. Хэнтий аймагт яг ижилхэн. Хэнтий аймгийн нэгдсэн эмнэлгийн барилга барьсан гэж байвал Ардын нам эндүүрч байна. Түүнийг чинь 2014 онд эхэлсэн юм. 120 айлын орон сууц ТОСК барьсан. Хэнтий Аймгийн Биндэр, Батширээт суманд хоёр сургууль ашиглалтад орсон нь нэг нь 2013 онд, нөгөө нь 2014 онд ашиглалтад орсон. Ардын намынхан зүгээр л тууз хайчилсан. Тийм учраас та нар ард түмний сонголтын өмнө очиж чадахгүй байна. Хэнтий аймгаас удаа дараа сонгогдсон Ардын намын дарга У.Хүрэлсүх чинь ичсэндээ тэнд очиж чадахгүй байгаа учраас та нар Үндсэн хуулийн цэцтэй нийлээд аргацааж магадгүй. Тиймээс сонгуулийн тухай хуульд өөрчлөлт оруулах хуулийн төслийг би өргөн барина. Ардын намыг сонгууль, сонголт, ард түмний өмнө үнэлгээ тавиулах цаг нь болсон” гэсэн юм.

Үүний хариуд УИХ-ын гишүүн, ХЗДХ-ийн сайд Ц.Нямдорж “УИХ нөхөн сонгууль явуулъя гээд шийдвэр гаргачихсан биз  дээ. Шийдвэрийг гишүүд санал нэгтэй л гаргасан. Гэтэл өчигдөр Цэцийн дүгнэлтийг хүлээж авахгүй гэсэн мэдэгдэл МАН, АН-гүй л хийцгээж байх юм. Яагаад айх, айхгүйн тухай асуудал, Цэцийн гишүүд МАН-д үйлчилдэг асуудал яриад эхлэв ээ. Жаахан цадигтай баймаар байна. Залуучууд та нар арай дэндэж байгаа юм биш үү? Юм ярилгүй л яахав. Баримттай ярь л даа.

Энэ Сонгуулийн хуулийг Р.Бурмаагийн хууль гэдэг юм. АН-ын үед баталсан. Наад хуулийг чинь батлагдаж байхад би эсэргүүцээд ярилцлага өгөөд явж байсан. Энэ хуулиар л төрийн албан хаагчдад хориг тогтоосон шүү дээ. Одоо юугаа яриад байгаа юм. Би эзэнтэй, нэртэй юм ярьж байна. Ерөнхийлөгчийн, УИХ-ын, орон нутгийн сонгууль гээд гурван өөр сонгуулийг хүчээр нэгтгэчихсэн. Одоо үүнийгээ л засах хэрэгтэй.

Чин үнэнийг хэлэхэд өмнө нь эрх барьж байсан нөхдүүд өөрсдөдөө улс төрийн давуу эрх олгох гэж хийцгээсэн шүү дээ. Тиймээс жаахан цадигтай байвал яасан юм бэ?

Д.Лүндээжанцан гишүүн Цэц дээр УИХ-ын шийдвэрийг хамгаалсаар байгаад ирж байхад захиалчихлаа гээд гүтгээд эхлэх юм. Арай дэндэж байна, Б.Пүрэвдорж оо, чи. Чам шиг юмыг зөндөө үзсэн, би. Бүр 300, 400-гаар нь үзсэн. Хэмжээ хязгаар, ёс жудаг, нас намба, төрийн хүний яриа гэж байдаг юм шүү. Б.Пүрэвдорж оо, чи жаахан даруухан байж үз. Чи хэн болоод УИХ-д орж ирчихээд бүхнийг мэдээд, бүхнийг шийдээд байгаа юм. Шүүмжилж болно. Гэхдээ үнэн юм ярь. Цэцийг Ардын нам томилсон юм уу? Цэцийн хамгийн сүүлийн гурван гишүүнийг хэн оруулж ирсэн билээ. Та нар дэмжээд л гүйж явсан. Цэцийн гишүүдийг гүтгэдгээ больж үз. Гэрчүүд нь энд сууж байхад гүтгээд байхаар байж ядаад байна” гэсэн юм.

Дашрамд дурдахад, Үндсэн хуулийн цэцийн сүүлд нэмэгдсэн гурван гишүүний хоёрыг нь Ерөнхийлөгч Х.Баттулга, нэгийг нь өмнөх Ерөнхийлөгч Ц.Элбэгдоржийн саналаар томилсон хэмээн байнгын хорооны гишүүд хэлж байв.

М.Бүүвэй

www.zindaa.mn