Зам, тээврийн хөгжлийн сайдаар Я.Содбаатар томилогдлоо

УИХ-ын чуулганы өнөөдрийн /2018.10.05/ нэгдсэн хуралдаанаар Зам, тээврийн хөгжлийн шинэ сайдыг томилох асуудлыг хэлэлцэн УИХ-ын гишүүн Я.Содбаатарыг хуралдаанд оролцсон гишүүдийн 90.8 хувийн саналаар дэмжлээ.

УИХ-ы чуулганы нэгдсэн хуралдааны үеэр ЗТХ-ийн шинэ сайдад нэр дэвшиж буй УИХ-ын гишүүн Я.Содбаатарт гишүүд амжилт хүсээд, цаашдын ажилдаа анхаарах саналыг хэлж байсан юм. Тухайлбал, ЗТХ-ийн өмнөх сайд, УИХ-ын гишүүн Ж.Бат-Эрдэнэ салбарын боловсон хүчний бодлогод анхаарч, мэргэжилтнүүдтэй хамтран одоогоор эхлүүлээд байгаа хэд хэдэн ажлыг үргэлжлүүлэхийг хүсч байв. Үүнд, УИХ-ын гишүүн Я.Содбаатар гишүүн “Монголын төрийн залгамж чанарыг ханган ажлын хариуцлагыг эрхэмлэн төрийн албан хаагч өргөсөн тангарагтаа үнэнч байхад анхаарч ажиллана” гэдгээ мэдэгдсэн юм. 

УИХ-ын чуулганы пүрэв гаригийн /2018.10.04/ нэгдсэн хуралдаанаар Зам, тээврийн хөгжлийн сайд Ж.Бат-Эрдэнийг өөрийнх нь хүсэлтээр үүрэгт ажлаас нь чөлөөлснөөр дараагийн сайдыг тодруулах улс төрийн үйл явц өрнөсөн. Үүнтэй холбогдуулан МАН-ын Удирдах зөвлөл хуралдан дараагийн сайдад УИХ-ын гишүүн Я.Содбаатарыг дэмжсэн. Улмаар УЗ-ийн саналыг УИХ дахь МАН-ын бүлэг 100 хувийн саналаар дэмжснээр УИХ-ын гишүүн Я.Содбаатарын ЗТХ-ийн сайд болох зам засагдсан юм.

Я.Содбаатар хэдийгээр зам, тээврийн салбарт мэргэжлийн хүн биш ч өмнө нь сайдын сунгаанд хоёр ч удаа дурдагдаад байсан. Өөрөөр хэлбэл, зам, тээврийн салбарыг удирдах улстөрчдийн нэгээр нэрлэгдэж ирсэн байдаг. Тэрбээр УИХ-д хоёр дахь удаагаа Өвөрхангай аймгаас сонгогдон ажиллаж байна. Өмнө нь Үйлдвэр, худалдааны сайд, дэд сайд, Мэргэжлийн хяналтын ерөнхий газрын дарга, дэд даргаар ажиллаж байгаад МАН-ын нарийн бичгийн даргаар томилогдож байсан. Улс төрийн замналаа НАМЗХ-ны нарийн бичгийн даргаар эхэлсэн Я.Содбаатарыг Ерөнхий сайд "У.Хүрэлсүхийн хүн" гэх яриа бий. Уичр нь тус холбооны нарийн бичиг байх үед нь НАМЗХ-ны ерөнхийлөгчөөр У.Хүрэлсүх ажиллаж байв. Мөн У.Хүрэлсүхийн Засгийн газар байгуулагдахад түүнийг Засгийн газрын Хэрэг эрхлэх газрын дарга, дараа нь МАН-ын бүлгийн даргад яригдаж байсан удаатай.

Я.Содбаатарын НАМТАР

Боловсрол /Англи, орос хэлтэй/

1992 онд       Өвөрхангай аймгийн Хархорин сумын нэгдүгээр 10 жил

1997 онд       Улаанбаатар их сургуулийг физикч-инженер

2004 онд       Удирдлагын академи

Ажилласан байдал

1997-1999 онд         ШУА-ийн харьяа Дулааны техник, үйлдвэрийн экологийн хүрээлэнд эрдэм шинжилгээний ажилтан

1999-2005 онд         Монголын Ардчилсан Социалист Залуучуудын Холбоонд нарийн бичгийн дарга, ерөнхий нарийн бичгийн дарга

2005-2006 онд         Үйлдвэр, худалдааны сайдын зөвлөх

2006-2008 онд         Үйлдвэр, худалдааны дэд сайд

2009-2010 онд         Мэргэжлийн хяналтын ерөнхий газрын дэд дарга, дарга

2010-2012 онд         МАН-ын нарийн бичгийн дарга

2012-2016 онд         УИХ-ын гишүүн

2016 оноос              УИХ-ын гишүүн

2018 оноос              Зам, тээврийн хөгжлийн сайд

Шагнал

2009 онд       “Алтан гадас” одонгоор шагнуулсан.