Ж.Энхбаяр: Би үнэхээр болгоомж алдсан, ард түмнээсээ уучлалт гуйсан

  УИХ-ын гишүүн Ж.Энхбаярын хувь эзэмшдэг компани Жижиг, дунд үйлдвэр /ЖДҮ/-ийг хөгжүүлэх сангаас зээл авсан нь тогтоогдсон. Энэ тухай дуулиан тарсны дараа тэрбээр зээлээ төлж барагдуулсан гэж мэдэгдсэн юм. Үүнтэй холбогдуулан УИХ-ын гишүүн Ж.Энхбаяраас зарим хэвлэл дараах тодруулгыг авч, байр суурийг нь сонирхлоо.   

-АТГ-аас Жижиг, дунд үйлдвэрийг хөгжүүлэх сангаас зээл авсан гишүүдэд хэрэг бүртгэл нээж, шалгаж эхэлсэн. Таны хувьцаа эзэмшдэг компани зээл авсан нь тогтоогдсон байдаг. Өнгөрсөн хугацаанд таныг АТГ-аас дуудаж тайлбар, мэдүүлэг авсан уу?

-Үгүй.

-Хэрэв зээл авсан асуудлаар хуулийн байгууллагаас таныг бүрэн эрхээс тань түдгэлзүүлж, шалгах хүсэлтийг УИХ-д өгвөл яах вэ?

-Би бүрэн эрхээсээ татгалзаж, шалгуулахад бэлэн. Энэ мэт зүйл дээр надаас авахуулаад шаардлагатай бол бүрэн эрхээсээ татгалзаж, шалгуулаад нэг мөр хариулт өгөх хэрэгтэй. Ингэхгүй бол үүний цаана улс төрийн маш олон өөр санаа, зорилго байна. Улмаар нийгмийг эмх замбараагүй байдалд турхирсан, дотор нь хагаралдуулж байна. Монголын ард түмний өнгөрсөн 30 жилийн хүсэл, тэмцлийн үр дүнд бий болсон парламентын засаглалыг нураах, хүчгүйдүүлэх, ард түмэн хийгээд төрийг хооронд нь эвдрэлцүүлсэн системтэй үйл ажиллагаа явагдаж байна. Би олон жил аюулгүй байдал, гадаад бодлогын чиглэлээр ажиллаж байна. Энэ ч утгаараа асуудлыг энэ өнцгөөс нь харж байна. Тусгай чиг үүргийн байгууллагуудыг хүчгүйдүүлэх бодлого үе, үе орж ирдэг байсан. Би ажиглаад л явсан. Үүнийг бид хамгаалж зогсож чадсан. Яг энэ үед л төрийг бужигнуулахад тусгай чиг үүргийн байгууллагууд төрийн тулгуур багана болж үлдэж чадсан. Хууль эрх зүй нь тогтвортой, ажил үүрэг нь ойлгомжтой болсон. Улс төрөөс хараат болсон юм. Тэнд ажиллаж байгаа ажилчин, албан хаагчийн нийгмийн хамгаалал нь баталгаажсан. Үүнийг том, чухал зүйлийг хийсэн гэж харж сууна.

-МАН-ын дотоод хагарал чинээндээ тулсан нь харагдаж байна. Үүнтэй та санал нийлэх үү?

-Хэрэв та нар анзаарч байгаа бол МАН дотор том өөрчлөлт, шинэчлэлт явагдаж байна. Мэдээж үүнийг эсэргүүцэгч том хүчин бий. Энэ тэмцэл хоёр жилийн өмнөөс эхэлсэн том тэмцлийг та бүхэн мэдэж байгаа байх. Хэсэг нөхөд гал авч, мөс зүсч нийгэмд бий болсон шударга бус, эрх мэдэл, албан тушаал дамжсан бугшсан зүйлийг өөрчлөхийн төлөө бид явж байна. Энэ тэмцэл үргэлжилж байна. Хүчний харьцаа нь нэг, хоёр хүн дээр л асуудлыг шийдэж байгаа. Аажим боловч бид урагшилж байна.

Нөгөө талаасаа хууль хүчний байгууллагууд захиалга өгч, албаар асуудлыг дэвэргэж гаргаж ирэн, энэхүү тэмцлийг оройлж, үүрэг гүйцэтгэж байгаа нөхдийг холдуулах, тэгж байж олон санал авах оролдлого маш хүчтэй хийгдэж байна. Тэгэхээр олон нийт үүнийг том зургаар нь харах хэрэгтэй. Үүний ард ямар том зүйл далд, нуугдаж байна, нийгмийн анхаарлыг яаж холдуулж байна, юунаас холдуулж байна гэдэг зүйлийг харах хэрэгтэй.

-Нэг үгээр хэлбэл, гишүүдийн Жижиг, дунд үйлдвэрийг хөгжүүлэх сангаас авсан зээлтэй холбоотой асуудлыг улс төрийн зорилгоор дэвэргэж байна гэж ойлгож болох уу?  

-Улс төрд болж байгаа үйл явдал зүгээр болдоггүй, дандаа учиртай байдаг. Бид үүнийг цөөлөх, холдуулах ажлыг тасралтгүй л хийсэн. Энд Д.Гантулгаас авахуулаад хийсэн шүү. Одоо бол хэсэг хүнийг л холдуулах ажил л явж байна. 

-Гэхдээ таны хувь эзэмшдэг компани зээл авсан, саяхан тэр зээлээ төлсөн нь үнэн биз дээ?

-Миний хувьд хууль зөрчөөгүй. Хулгай хийж, хууран мэхлээгүй. Эрх мэдэл, албан тушаалаа ашиглаагүй. Миний хувьцаа эзэмшдэг хөдөө, аж ахуйн чиглэлээр үйл ажиллагаа явуулдаг компани мэргэжлийн яамныхаа зарласан хөтөлбөрт нь төсөл бичиж, барьцаа хөрөнгөө гаргаж, төслийн гурван шалгаруулалтад нь тэнцээд санхүүжилтээ авсан. Улмаар ажлаа хийж байсан. Миний бие энэхүү үйл явдлыг улс төр болж хувирч байгаа болохоор хурдан та нар зээлээ төл гэж хэлсэн. Тэд Хасбанкнаас зээл авч, зээлээ төлсөн. Ийм нөхцөл, байдалд орсондоо Монголынхоо ард түмнээс би уучлалт гуйсан.

-Үнэхээр та нөлөөлөөгүй гэж үү?

-Тийм ээ, нөлөөлөөгүй. Харин үнэхээр би болгоомж алдсан байна билээ.

-Гэхдээ таныг банк бус санхүүгийн байгууллагад тодорхой хувь эзэмшдэг, энэ мөнгийг угаасан байж болзошгүй гэж яриад байна шүү дээ?

-Аль болох л харлуулах, буруутгах талдаа л чиглэж байна. Санхүүгийн зохицуулах хорооноос мэдэгдэл гаргасан байна билээ. Монголбанк бол арилжааны банкуудад хяналт тавьдаг. Хөрөнгийн бирж зэрэгт Санхүүгийн зохицуулах хороо хяналт тавьдаг.

-Ямар хяналт тавьдаг гэж вэ?

-Энэ эх үүсвэр нь цэвэр мөнгө үү, татвараа төлсөн үү. Ямар нэгэн гэмт хэрэг, мөнгө угааж байж болзошгүй гэдгийг нь хуулийнхан нь хянасны дараа банк бус гэдэг чинь үйл ажиллагаагаа явуулдаг юм. Дур зоргоороо эндээс мөнгө аваад тийшээ хийчихдэг гэж энгийнээр ойлгоод байна. Тийм зүйл байхгүй, боломж ч байхгүй. Энэ ч утгаараа Санхүүгийн зохицуулах хороо албан ёсны мэдэгдлээ гаргасан байх гэж бодож байна.

Б.ЭРХЭС

WWW.ZINDAA.MN