“АТГ М.Энхболдын заавраар 100 хувь хөдөлдөг нь нотлогдлоо”

УИХ-ын дарга М.Энхболд УИХ-ын үйл ажиллагааг гацааж, хурал хаяж явсан болон УИХ-ын гишүүдийн гэр бүлийнхнийг хүчний байгууллагынханд дарамталж эхэлсэн талаарх мэдээллийг өнөөдөр /2018.11.29/ УИХ-ын гишүүн Л.Оюун-Эрдэнэ хийсэн билээ. Уг мэдэгдлийн дараагаар УИХ-ын дарга М.Энхболд өөрийн фэйсбүүк хуудсаараа дамжуулан Л.Оюун-Эрдэнэ гишүүн албан ёсоор уучлал гуйх ёстой, УЕП, АТГ, ЦЕГ-аас залруулж, албан ёсны мэдэгдэл хийхийг хүссэн тухайгаа бичиж, түгээсэн юм.  

Уг асуудалтай холбогдуулан УИХ-ын Тамгын газраас мөн тайлбар хийсэн. Түүнчлэн АТГ-аас сэтгүүлчдийг цуглуулан “Л.Оюун-Эрдэнэ гишүүний хамаарал бүхий этгээдийг шалгаж байгаа” гэх мэдээлэл хийв.

Дээрх цуварсан мэдэгдлүүдтэй холбогдуулан УИХ-ын гишүүн Л.Оюун-Эрдэнэ тайлбар хийсэн юм. Тэрбээр “Өнөөдөр УИХ-ын тамгын газар, АТГ-аас надтай холбоотой мэдээлэл хийлээ. Миний хувьд маш баяртай байна. Өнөөдөр М.Энхболд гэдэг хүний заавраар АТГ хөдөлдөг гэдэг нь 100 хувь нотлогдоо гэсэн юм. Тэрбээр мөн “АТГ-т шалгагдаж байгаа нэг ч хүний нэрийг хэлээгүй мөртлөө. Ганцхан Л.Оюун-Эрдэнэ гэдэг хүн холбогдсоныг зарлалаа. Зөвхөн энэ өгүүлбэр нь АТГ бол М.Энхболдын хувийн компани болсныг харуулж байна. Би олон удаа ярьж байсан. АТГ дээд зэргээр улс төрждөг байгууллага. Өмнө нь Засгийн газрыг солих тухай асуудал яригдаж байхад УИХ-ын Тусгай хяналтын дэд хороог М.Энхболд завсарлуулаад одоогийн Ерөнхий сайд У.Хүрэлсүхэд өөрийгөө тагнаж, чагнасан гэх хэргийг тулгасан. Яг энэ хэрэг давтагдаж байна. АТГ гэдэг байгууллага

60 тэрбум төгрөгтэй холбоотой асуудал болохоор дув дуугүй алга болдог.

"Чингис", "Самурай" бондтой холбоотой асуудал болохоор дув дуугүй алга болдог.

Хөгжлийн банктай холбоотой асуудал ярихаар дув дуугүй алга болдог.

Нүүрсний мөргөцөг алга болсон хэрэг болохоор дув дуугүй алга болдог.

Цахиагийн Элбэгдоржтой асуудлуудыг шалга гэхээр дув дуугүй алга болдог.

Х.Бадамжунайтай холбоотой асуудлыг шалга гэхээр дув дуугүй алга болдог.

Миеэгомбын Энхболдтой холбоотой асуудлуудыг шалга гэхээр дув дуугүй алга болдог.

Тэгсэн мөртлөө тэд нар утасдахаар гэнэт шуурхай хөдөлдөг, нэг улстөрчийн дэргэдэх байгууллага болсон байна. АТГ 60 тэрбум төгрөгийн хэргийг дуу дүрсжүүлсэн нь эвлүүлэг гэж хаасан байсан.  

АТГ зунжингаа миний араас хөөцөлдөж байгаа. Төгөлдөр гээд Төв аймгийн нөхөр энэ ажиллагааг зохион байгуулж байгаа. АТГ-ын дарга Х.Энхжаргал ч гэсэн М.Энхболд гэдэг хүнийг хамгаалахын төлөө байдаг. Үүнийгээ улстөрчдөд мэдэгддэг. Гэхдээ өнөөдөр арай ч ийм дээрээ тулж болохгүй. Энэ бол 1939 он биш. Нэг ч удаа АТГ намайг байцаалт өг гэж хэлээгүй. Гэтэл улс төрийн халуун уур амьсгалтай үед зөвхөн намайг нэрлэж байгаа нь хэт улс төржсөн үйл явдал” гэж мэдэгдлээ.

УИХ-ын гишүүн Л.Оюун-Эрдэнэ хууль хүчний байгууллагаас УИХ-ын гишүүд, тэдгээрийн гэр бүлийнхнийг дарамталж байгаа гэсэн мэдээллээ тайлбарлахдаа “Надтай болон миний хамаарал бүхий этгээдтэй холбоотой нэг ч хүн ЖДҮ-ээс зээл аваагүй. Авах ч үгүй. Би нэг ч компанид дэмжсэн бичиг өгөөгүй. Тэгэхээр над дээр ийм асуудал үүсгэж байна гэдэг нь бичиг өгчихсөн, магадгүй аль нэг компанидаа зээл авчихсан гишүүдэд ямар их хэмжээний албан болон албан бус дарамт байгаа нь ойлгогдоно.

Миний мэдээлэл үнэн. УИХ-ын гишүүдийг дарамталж байгаа. УИХ-ын гишүүд үг хэлэх боломжгүй болгож байна. Нэг асуудал яриад ээлжит бус чуулган дээр гарын үсэг зурах төдийд хэргийг сэргээдэг нөхцөл байдал Монголын улс төрд нүүрлээд удаж байгаа. Тийм учраас цорын ганц дугарч байгаа хүн над руу АТГ орж байгаа юм байна. Гэхдээ хэлс хэргээр хэлмэгдүүлчихдэггүй л юм бол миний хувьд 100 хувь итгэлтэй байгаа. Цаашдаа ч АТГ холбоотой олон асуудлыг гаргаж тавих болно” гэсэн юм.

УИХ-ын гишүүн Л.Оюун-Эрдэнэ “УИХ-ын дарга маань дэгийн тухай хууль зөрчөөд 10 цагаас хойш чуулганыг хууль бусаар хуралдуулсангүй. Өөрсдийнх нь өргөн барьсан Засгийн газрыг огцруулах тухай асуудлыг хэлэлцэх байсан. Тэдний товчлуур нь хүрээгүй учраас Ёс зүйн хороог хуралдуулах шалтгаанаар чуулганыг хууль бусаар гацаалаа. УИХ-ын гишүүдийн ирц хүрчихсэн байхад УИХ-ын дарга нь орж ирсэнгүй. Монгол төрийн түүхэнд анхны тохиолдол болж байна” гэсэн юм.

Тэрбээр үргэлжлүүлэн “МАНАН бүлэглэлийн сүүлчийн амьсгал тасрах дөхөж байна. М.Энхболд гэдэг хүн УИХ-ын чуулган руу дахиж удирдах байдлаар орох боломжгүй. Монгол төрийн түүхэнд ийм хурлын дарга хэзээ ч байхгүй. Цаашдаа ч байж болохгүй. Ээлжит бус чуулган хуралдуулах хүсэлтийг 26 гишүүн тавихад Үндсэн хууль дээрх заалтыг өнөөдрийг хүртэл зөрчлөө. Харамсалтай нь Цэц нь хүртэл яг АТГ-тай адилхан утсан хүүхэлдэй болсноо удаа дараа нотолж байгаа. Хууль гэж байдаг бол энэ асуудал шийдэгдэх ёстой. Хуулийн дээр хувь хүн суучихаад байна. Дарангуйлагч гарч ирсэн. УИХ-ын дарга хуралдаа орж ирэхгүй байснаас болж УИХ-ын Тамгын газрын бүх ажилчид орж ирж чадахгүй. Орох юм бол ажлаас халагдах дээрээ тулсан нөхцөл байдалд оруулж болохгүй. УИХ-ын Тамгын газрын ажилчид бол М.Энхболдын албатууд биш. Та нар ард түмний төлөөлөл болсон нийт парламентад үйлчлэх ёстой шүү” гэсэн юм.

М.БҮҮВЭЙ

WWW.ZINDAA.MN