“Испанийн мисс” болсон трансжендер бүсгүй ээж болохоор төлөвлөж байна

“Ертөнцийн мисс” тэмцээнд Испанийг төлөөлөн оролцох 27 настай Анхела Понсе дэлхийн анхны трансжендер мисс болохыг зорьж байгаа аж. Тайландад энэ сарын 17-нд болох “Ертөнцийн мисс” тэмцээний ялагч болно гэдэгтээ итгэлтэй байгаа Анхела Понсе эрэгтэй төрсөн ч бага байхаасаа л эмэгтэй байхыг хүсдэг байжээ. Тэрбээр 16 настайгаасаа эхлэн дааврын эмчилгээ хийлгэж, 24 настайдаа хүйсээ солиулсан байна.

Анхела моделийн карьер хөөж, 2015 онд “Испанийн мисс” тэмцээнд оролцсон ч ялагч болж чадаагүй аж. Харин энэ жил тэрбээр “Испанийн мисс”-т дахин оролцож, 20 гаруй сайхан бүсгүйг ардаа орхиж, ялагч болсон байна. Тэрбээр одоо “Ертөнцийн мисс” болж, үүнийхээ дараа ээж болох төлөвлөгөөтэй байгаагаа сэтгүүлчдэд ярьжээ.

О.Чанцаа

WWW.ZINDAA.MN