Н.Алтанхуяг: УИХ-ыг тараах тэмцэлд нэгдэхийг уриалж байна

Ерөнхий сайд асан Н.Алтанхуяг Үндэсний мэдээллийн төвд яг одоо цаг үеийн асуудлаар мэдээлэл хийж байна. Тэрбээр хэвлэлийн хурлын үеэр "Нэгдмэл Монгол" хөдөлгөөн байгуулсан талаараа мэдэгдлээ.

Н.АЛТАНХУЯГ:

-Монголчууд бид ухаан, эр зориг, эв нэгдлээрээ үнэт зүйлээ хамгаалж, нэг сэтгэлээр зүтгэх цаг ирээд байна. Төр нь иргэдийнхээ боломжийг хулгайлж, нам нь мафижсан бүлэглэл болж, иргэдийн итгэлийг алдаж байна.

УИХ-ыг ёс зүйн чадамжгүй гэж үзэж, нэн даруй тараах тэмцлийг эхлүүлье. Монголын баялгийг хууль бусаар эзэгнэх үйл явцыг зогсоох хэрэгтэй байна. Үүний тулд сэтгэл санаа хүч чадлаа нэгтгэн гурван зүйлийг хийх шаардлагатай байгааг би та бүхэнд зарламаар байна. 

Шударга ёсыг сэргээн тогтооё. Байгалийн баялгийг ард түмнийхээ мэдэлд ѳгье. Дундаж давхаргын ѳрхѳѳ дэмжье. Энэ парламентыг тараая. Хувь хүн биш хууль засагладаг тогтолцоогоо сэргээе. Лиценз наймаалдаг байдлыг зогсооё. Хѳрѳнгѳ оруулалтыг үр ашигтай болгоё гэж уриалмаар байна.

Эрх мэдэлтнүүдэд ээлтэй, ард түмэнд халтай хуулийн засаглалыг халж, дараа нь намуудыг өмчгүй болгох хэрэгтэй. 

Стратегийн ордуудаас орж ирдэг мөнгийг нэгтгэж, сан бий болгомоор байна. Авлигачдын мөнгийг төр хурааж аваад, гэр хорооллыг орон сууцжуулахад зарцуулмаар байна. Маргаашаа бий болгох бүтээн байгуулалт хийцгээе. Эх орныхоо төлөө, монголоо гэсэн сэтгэлтэй хүн бүхнийг энэ тэмцэлд нэгдэхийг уриалж байна. УИХ-ыг тараах тэмцэлд уриалж байна.

Би АН-ын гишүүн хэвээрээ байгаа. Гэхдээ намдаа сэтгэл дундуур байна. Учир нь АН Монголын нийгэмд бугшсан зүйлсийг арилгахын төлөө дорвитой ажиллахгүй байна. Дэндүү явцуу байна. Бид С.Баяртай хамтарч Засгийн газар байгуулж байсан. Гэхдээ хамтарсан Засгийн газар байгуулах нь МАНАН байгуулахаас тэс өөр. Хамтраад эх орныхоо төлөө ажиллая л гэж байгуулж байсан. Гэтэл 2004 онд хамтарсан Засгийн газар байгуулагдсан нь МАНАН-гийн эхлэл байжээ. Би МАНАН-г байгуулахад оролцсон бол өдийд энд байхгүй, гадуур зугаалаад явж байх байлаа. Би улстөрчдөд хэтэрхий их шунал тачаалаа дараач гэж хэлмээр байна. Ялангуяа өмнө нь байсан, хэтэрхийх их шуналтай улстөрчдөд хандаж энэ үгийг хэлмээр байна.

Авлигын диваажинг хувьчилж авсан хүмүүсийг хариуцлага тооцох болжээ. “60 тэрбум”-ыг бий болгосон М.Энхболдтой хариуцлага тооцох ёстой. УИХ-ыг тараах ёстой. Нийслэлийн газрыг зарсан бүлэг этгээдтэй хариуцлага тооцьё. Шударга бусын хонгилыг нурааж, тэгш журамт ёсыг сэргээх цаг ирлээ. Дахин хэлье. Гурван төрлийн ажлыг яаралтай хийх хэрэгтэй.

• Нэгдүгээрт, Шударга ёсыг сэргээе
• Хоёрдугаарт, байгалийн баялгийг ард нийтийнх болгоё
• Гуравдугаарт, Чинээлэг дундаж давхаргыг сэргээе

Эхний асуудлын цаана таван зүйл бий. Хууль хяналтын салбарын хууль бусын хонгил нийгмийн бүх салбарт үсэрхийлсэн байна. “60 тэрбум”-ыг дэмжигдчийг шударга шүүхийн өмнө аваачих ёстой.

Авлигажсан төсөв зохиодгийг таслая. Монголчуудад биш гадаадынханд ашигтай зээл авдгийг зогсооё. Чинээлэг дундаж давхаргыг босгоё. Шатахуун түгээх сүлжээг хоршоолсон хэлбэрт оруулъя. Талцаж суух цаг өнөөдөр биш. Үр хойчдоо нүүр бардам ирээдүйг хүлээлгэж өгөх ажлыг эхлүүлье, зохион байгуулъя.

МАНАН-гийн суурь 2004 онд тавигдсан юм шүү!

Эл мэдээллийг хийснийхээ дараа тэрбээр сэтгүүлчдийн сонирхсон асуултад хариуллаа. 

-Таныг анх МАНАН-гийн Засгийн газар байгуулалцсан хүн гэж ярьж байна?

-Бид С.Баяртай хамтарч Засгийн газар байгуулсан. Гэхдээ хамтарсан Засгийн газар байгуулах нь МАНАН байгуулахаас тэс өөр юм. Хамтраад эх орныхоо төлөө ажиллая л гэсэн. МАНАН-гийн суурь анх 2004 онд хамтарсан Засгийн газар байгуулахад бүрэлдсэн юм шүү.  Хамтарч Засгийн газар байгуулах, бүлэглэл байгуулах хоёр тэнгэр газар шиг ялгаатай. Би МАНАН бүлэглэлд орж нэгдсэн бол өнөөдөр хүний нүүр харах эрхгүй болох байсан. Энэ бүлэглэлийг “Эрдэнэт” үйлдвэрээс булааж авсан хэдэн арван тэрбум төгрөг, мөн 49 хувиа буцаагаад өгөөч гэж шаардмаар байна.

-Ерөнхийлөгч асан Ц.Элбэгдоржоос та намайг огцруулаад өгөөч гэж гуйсан юм уу?Тэр ингэж ярьсан байсан?

-Ц.Элбэгдорж шүлэг бичиж байгаад сурвалжлагч болсон хүн. Сурвалжлагч болоод гэмт хэрэг бичдэг болсон.  Намайг дуудаж уулзаад, "Н.Алтанхуяг аа, өргөдлөө өг" гэсэн. Би ажил хиймээр, ард түмнийхээ төлөө ажилламаар байна гэдгээ хэлсэн. Намайг огцруулах УИХ-ын чуулганы нэгдсэн хуралдаанд АН-ын долоон гишүүнийг барьцаалаад, оруулаагүй. УИХ-ын найман гишүүнийг оруулж, кноп даруулсан. Манай намын харьяалалтай, УИХ-ын гишүүний хүүхэд машинаар хүн шүргэсэн хэргийг хаасан байсан юм билээ. Гэтэл тэр хэргийг сэргээсэн байсан.

-Таны ард ямар хүмүүс байна вэ. Төрийн бус байгууллагууд нэгдсэн үү?Та гэнэт ингэж мэдэгдэл хийх болсон нь ямар учиртай вэ?

-Шударга бусын хонгилыг нураая гэвэл надтай нэгд гэж уриалах гэж л би энд зогсч байна. Байгалийн баялгийг 100 хүн биш ард түмэн хүртдэг байлгахын төлөө байдаг бол нэгдэцгээе. Түүнээс биш дэмжихгүй бол  надаас хол явах хэрэгтэй. Ах дүүсээрээ, танил нөхөд, хамаатан садантайгаа нэгдэж, улс төрийн нам байгуулдаг болсон. Тэд ард түмний өмнө, шүүхийн өмнө буруугаа хэзээ ч хүлээдэггүй.

-Та АН-ын гишүүнчлэлээсээ гарах уу?

-Би АН-ын гишүүнчлэлтэй. АН хэрэв шударга бусын хонгилыг нураахын төлөө тэмцээд байвал би үйл ажиллагаанд нь идэвхтэй оролцоно. Надад 2020 оны сонгуульд АН ялагдаасай гэсэн бодол байхгүй.

-Ерөнхийлөгч, УИХ-ын дарга, Ерөнхий сайдын үйл ажиллагааг юу гэж харж байна вэ?

-Н.Алтанхуягийн бодох нэг хэрэг. Өнөөдрийн үйл явцыг ард түмэн хэрхэн харж дүгнэж байгаагаас мэдэгдэж байна. Миний байр суурийн шаардлага байхгүй.

-Хуулийн байгууллагад шударга бус зүйл үсэрхийлсэн гэж та хэллээ. Юуг хэлснээ тодотгож болох уу?

-Хуулийн байгууллагууд дэндүү ялзарч байна. АН-ын  даргын сонгуульд 5-6 хүн өрсөлдсөн. Тэр үед намайг дуудаж, яллагдагч болгоно гэж байсан юм шүү.

ШУУД ҮЗЭХ

WWW.ZINDAA.MN