“Нортерн Рэйлвэйс” компани БНХАУ-тай бүтээн байгуулалтын гэрээнд гарын үсэг зурлаа

Монгол Улсад бүртгэлтэй “Нортерн Рэйлвэйс” компани БНХАУ-ын “Гежүба” олон улсын инженерийн компани, Хятадын Төмөр замын 20 дугаар компанитай бүтээн байгуулалт, худалдан авалт, инженерийн гэрээнд албан ёсоор гарын үсэг зурсныг Синьхуа агентлаг мэдээллээ. Өнгөрсөн долоо хоногт БНХАУ-д болсон “Бүс ба Зам” санаачилгын хоёрдугаар форумд оролцох үеэр дээрх гурван компани гэрээнд гарын үсэг зурсан байна. Гэрээ ёсоор дээд тал нь 1.58 тэрбум ам.долларын бүтээн байгуулалт, барилга угсралтын ажил хийх юм. “Гежүба” компани “Овоот” төслийн эхний шатны төслийн ажилд буюу 560 км төмөр зам барих ажилд гэрээлэгчээр оролцох хүсэлтэй байгаагаа албан ёсоор илэрхийлээд байгаа юм. Тус компани гэрээлэгчээр оролцсон тохиолдолд БНХАУ-н хэд, хэдэн банкнаас 165 сая ам.доллар босгох бүрэн боломжтой гэдгээ илэрхийлээд байна. Энэ мэдээллийн дараа “Аспайр Майнинг” компанийн гол хөрөнгө оруулагчид яаралтай уулзахаар болжээ.

“Нортерн Рэйлвэйс” компани нь Австралид бүртгэлтэй “Аспайр Майнинг” компанийн төмөр замын дэд бүтцийг эрхэлсэн салбар компани юм. Тус компани Эрдэнэт хот болон “Аспайр Майнинг” компанийн Овоот дахь коксжих нүүрсний төслийн хооронд баригдах олон хэрэглэгч бүхий төмөр зам барих асуудлыг хариуцдаг компани билээ. Хойд бүсийн төмөр зам нь Монголын хойд хэсгийн Хөвсгөл, Булган, Завхан аймгуудыг Эрдэнэт хот дахь Транс-Монголын төмөр замын сүлжээнд холбох зорилготой аж.