Х.Тэмүүжин: С.Эрдэнэ талийгаачтай хамгийн сүүлд уулзсан гэдэг нь ташаа

Ардчилсан нам /АН/-аас цаг үеийн асуудлаар мэдээлэл хийж байна. УИХ-ын гишүүн агсан Г.Батхүүгийн нас барсан шалтгааныг гадны нөлөөтэй байж болзошгүй гэж АН үзэж байгаа аж. 

Ардчилсан намын Ерөнхий нарийн бичгийн дарга Ц.Туваан "АН-ын дэд дарга Г.Батхүүг учир битүүлгээр нас барсан, цочирдом үйл явдал болсон. Талийгаач Тэрээр тухайн өдөр Төрийн ордонд болсон “Торгоны зам” олон улсын автораллиг зохион байгуулах ажлын хэсгийн хуралд оролцсон. Төрийн тусгай хамгаалалттай онцгой объект болох Төрийн ордны баруун жигүүрт Засгийн газрын хуралдаан болдог танхимын урд талын гонхноос унасан байдалтай нас барсан. Мөн гаднын нөлөөтэй амиа алдсан байх магадлалтай. Талийгаачийн бие эрүүл байсан. Ар гэрийнхнийх нь мэдээллээр өнгөрсөн дөрөвдүгээр сард гадаад улсад эрүүл мэндийн иж бүрэн шинжилгээ хийлгээд бие нь эрүүл гэсэн хариу гарсан байдаг. Сүүлийн үед хэвлэл мэдээллийн хэрэгслээр, ялангуяа сошиал орчинд талийгаачийг харлуулах, хийж буй ажилтай нь холбоотой худал мэдээлэл гаргаж байгаад харамсаж байна. АН-ын дэд дарга хүн амиа алдсан явдалд АН улс төрчиж, ашиг хонжоо хайсан мэтээр мэдээлэл мөн гарсан. АН энэ асуудал дээр улс төрчихгүй. Үйл явдлын үнэн мөнийг олохын төлөө явна. Цагдаагийн байгууллага нэлээдгүй хугацаа өнгөрсөн ч бидэнд болон ар гэрийнхэнд нь мэдээлэл ирүүлээгүй байна. Үнэн бодит мэдээллийг цагдаагийн байгууллага өгнө гэдэгт найдаж байна” гэлээ.

Мөн УИХ-ын гишүүн асан, АН-ын дэд дарга Х.Тэмүүжин "Төрийн ордонд хоёр, гуравхан камер байдаг. Чуулганы танхим руу ордог хэсэг болон орж, гарах хаалганы үүдэнд камер бий. Хэрэг явдал болсон газар камер байгаагүй. Цагдаагийн байгууллага ямар нэгэн мэдээлэл хийгээгүй байхад, хэвлэл мэдээллээр шатнаас унасан байна, зүрх нь хаагдсан байна гэх мэтчилэн бодит байдалтай нийцэхгүй мэдээлэл тархсан байдал нь яагаад өөр зүйл рүү нөхцөл байдлыг хөтлөх болов гэдэг эргэлзээтэй зүйл төрж байгаа. Одоогоор цагдаагийн байгууллага ямар нэгэн баримт мэдээлэл өгөөгүй байна. Талийгаач шатнаас унаагүй. Засгийн газрын хуралдаан болдог танхимын урд талын гонхноос унасан байдалтай нас барсан. Унасан шалтгааны хэлж мэдэхгүй байна. Ямар ч байсан өндрөөс унасан. Маш их гэмтэлтэй. Гэмтлийн улмаас нас барсан байна гэдэг дүгнэлт рүү очиж байх шиг байна. Хэвлэл мэдээллийн хэрэгслээр гарсан шиг бие нь муудсан гэдэг нь тогтоогдоогүй. Ар гэрийнхнийх нь зүгээс хөндлөнгийн шинжээч оруулах хүсэлт тавьсан ч Прокурорын байгууллага хүлээж аваагүй. Хэвлэл мэдээллийн хэрэгслээр талийгаачтай хамгийн сүүлд уулзсан хүн нь С.Эрдэнэ гэх мэт худал мэдээлэл тарж байгаа. Тийм зүйл болоогүй. Хамгийн сүүлд уулзсан хүн нь тодорхой болсон. Үүнийг хууль, хяналтын байгууллагууд тодруулж байгаа. Талийгаачийн нас барсан шалтгааныг гадны нөлөөтэй байж болзошгүй гэж харж байгаа. Шат болон гонхны хооронд нэлээд зайтай. Хүн өөрөө унах боломжгүй. Та бүхэн өөрсдөө хараад ойлгох байх" гэлээ. 

ШУУД ДАМЖУУЛЖ БАЙНА