Польшид монгол сум хүргэх итали бүсгүй Калугад саатлаа

Монгол сумыг Польшийн Краков хотод хүргэхээр мориор аялж байгаа Италийн аялагч бүсгүй Паола Жаконими ОХУ-ын Калуга хотод хүрлээ.

Ямар учиртай бүсгүй, яагаад монгол сум хүргэх гэж яваа талаар эндээс уншина уу.

Паола Жаконими өдөр бүр 30 км аялдаг. Гар утсандаа байрлуулсан навигаторын ачаар замаа олдог. Дундад зууны үеийн Монголын их гүрний цэрэг дайчдын замаар тэр замнаж байгаа.

Паола Монголоос гараад Алтай, Сибирь, Урал, Оросын төв хэсгийг саадгүй туулсан ч Калугад бага зэргийн саатал гарчээ.  

Паола хоёр монгол морьтой. Нэгэнд нь Чигээрээ (урагш, шулуун), нөгөө мориндоо Хамгаалагч (Сustode) гэсэн нэр өгсөн гэнэ. Калугад хоноод өглөө сэртэл Хамгаалагч уяанаасаа мултраад алга болсон байжээ. Паолад туслахаар Калуга хотын гал сөнөөгчид ирж, дрон нисгэн, бүтэн дөрвөн цаг хайж байж олсон байна. Хамгаалагч эх нутгаа санасан бололтой, буцан явж байгаад баригджээ.