Хар тамхи наймаалагч С.Баярмаад үзүүлсэн ӨРШӨӨЛИЙГ ЦУЦАЛЖ, зургаан жилийн ял оноолоо

Хар тамхины хэргээр арван жилийн ял шийтгэгдэж байсан С.Баярмаа, Х.Мөнх-Эрдэнэ нарыг тэнсэн харгалзах хугацаандаа Монгол Улсын хилээр хууль бусаар хар тамхи, сэтгэц нөлөөт бодис оруулахыг завдсан хэргээр саатуулсан билээ.

Тодруулбал, өнгөрөгч оны арваннэгдүгээр сард БНХАУ-аас Монгол Улс руу хар тамхи зөөвөрлөн оруулж ирэхэд нь Цагдаагийн ерөнхий газрын Хар тамхитай тэмцэх газрын алба хаагчид дайчлан баривчилсан байдаг.

Улмаар нийслэлийн прокурорын газрын хяналтын прокуророос С.Баярмаад, Эрүүгийн хуулийн тусгай ангийн 20.7 дугаар зүйлийн 2 дахь хэсэгт заасан гэмт хэрэгт, Эрүүгийн хуулийн тусгай ангийн 20.7 дугаар зүйлийн 2 дахь хэсэгт заасан гэмт хэрэгт Х.Мөнх-Эрдэнийг тус тус холбогдуулан яллах дүгнэлт үйлдэж, хэргийг шүүхэд шилжүүлээд байсан юм. 

Дээрх хэргийг Сонгинохайрхан дүүргийн Эрүүгийн хэргийн анхан шатны шүүхэд хэлэлцэж, шүүх бүрэлдэхүүн шийдвэрээ гаргалаа.

Хурлыг тус шүүхийн шүүгч Л.Баатар даргалж, нээлттэй хэлэлцсэн бөгөөд С.Баярмаа, Х.Мөнх-Эрдэнэ нарыг мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгоор хууль бусаар олж авсан, хадгалсан, тээвэрлэсэн гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 20.7 дугаар зүйлийн 2-т зааснаар С.Баярмааг 6 жилийн хорих ял, Х.Мөнх-Эрдэнийг 5 жил хорих ял тус тус шийтгэж, тэдэнд оногдуулсан хорих ялыг Эрүүгийн хуулийн ерөнхий ангийн 5.6 дугаар зүйлийн 4 дэх хэсэгт зааснаар нээлттэй хорих байгууллагад эдлүүлэхээр шийдвэрлэлээ.

Түүнчлэн дээрх хоёр этгээд өмнө нь хар тамхи зарсан, хэрэглэсэн гэх хэрэгт холбогдож байсан бөгөөд Баянгол дүүргийн эрүүгийн хэргийн шүүхээс 2016 онд ял шийтгэж арван жилийн хорих ял оноож байсан юм. Улмаар 2017 оны долоодугаар 1-ний өдрөөс шинээр мөрдөгдөж эхэлсэн Эрүүгийн хуулийн зүйлчлэлээр ялыг өөрчилж, 2015 оны Өршөөл үзүүлэх тухай хуулийн 7.1 дүгээр зүйлийн 1 дэх хэсэгт зааснаар хэргийг хэрэгсэхгүй болгож өршөөлд хамруулсан шүүхийн шийдвэрийг хүчингүй болгож шийджээ.