Б.Болороо ЧАДЛАА, хуулийнхан ҮНЭНД ГҮЙЦЭГДЛЭЭ

Олон нийт хөгжлийн бэрхшээлтэй иргэдийн дуу хоолой болсон Б.Болороо гэх бүсгүйг таньж, мэддэг болоод олон жил болж байна. Сүүлийн нэг жилийн хугацаанд түүний зорьж тэмцсэн ганц хүсэл нь талийгаач нөхрийнхөө нэр төрийг сэргээх явдал байв.

Б.Болороо бүсгүйн нөхөр өнгөрсөн оны зургаадугаар сард ажлын байран дээрээ амиа алдаж, нөхрийнх нь илжирч муудсан цогцсыг 19 хоногийн дараа ажиллаж байсан газрынх нь лифтний хонгилоос олсон бөгөөд шүүх эмнэлгийн шинжилгээгээр архи хэтрүүлэн хэрэглэснээс болж, хонгил руу унаж, амиа алдсан гэх дүгнэлтийг гаргасан байдаг. 

Шүүх эмнэлгийн дүгнэлтийг эс хүлээн зөвшөөрсөн Б.Болороо нөхрийнхөө нэр төрийг сэргээх тэмцлийг эхлүүлсэн билээ.

Тухайн үед тэрбээр "Манай нөхрийг ажлын байран дээрээ архи ууж, түүнээсээ болж нас барсан гэж байгаа. Задлан шинжилгээний дүгнэлтээр нөхрийн минь согтолтын зэрэг 2.4 буюу өөрийгөө хянах чадваргүй болтлоо согтсон гэж гарсан. Би бол бусдын нөлөөтэй амиа алдсан гэж бодож байна" хэмээн ярилцлага өгч байв. 

Өнгөрсөн хугацаанд Б.Болороо хэд хэдэн удаа хэвлэлийн бага хурал хийсэн. Тэр ч битгий хэл, өвлийн хүйтэнд төв талбай дээр хүртэл суулт хийсэн. Талийгаач нөхрийнхөө үхлийн шалтгааныг үнэн, зөвөөр тодорхойлуулахын тулд төрийн гурван өндөрлөг болон цагдаа, хуулийн байгууллагын дарга нарт өргөдөл, гомдол хүртэл өгч байв. Түүнийг төв талбай дээр суулт хийж байхад нь Ерөнхий сайд У.Хүрэлсүх уулзаж, хэргийг нь дахин шалгах үүргийг хуулийн байгууллагад даалгасан байдаг. 

Хөгжлийн бэрхшээлтэй мянга, мянган иргэний төлөөлөл болсон Б.Болороо бүсгүйн талийгаач нөхрийнхөө нэр төрийг сэргээхийн төлөө тэмцсэн тэмцэл үр дүнгээ өгчээ. Болороо ялжээ. 

Тэр өчигдөр (2020.05.11) өөрийн цахим хуудаснаа "Шүүх эмнэлгийн дахин бүрэлдэхүүнтэй шинжээчдийн дүгнэлтээр алкохол хэрэглээгүй нь тогтоогдсон. Өөрөөр хэлбэл 2.4 промилл хэмжээ нь согтолтын зэрэг биш тэр дор 19 хоног байж өмхийрч, муудсанаас бий болсон исэлтээс үүдсэн хэмжээ гэж гарсан. Мөн МХЕГ-аар дахин бүрэлдэхүүнтэй шинжээч томилуулан дүгнэлт гаргахад миний хань БУРУУГҮЙ, КОМПАНИЙН 100 хувь  буруу гэж гарсан. Миний эцсийн, цор ганц хүсэл бол ханийнхаа нэрийг л цэвэрлэх байсан. Би зорилгодоо хүрсэн, гэхдээ өөрийн сайндаа биш ТА БҮГДИЙН ДЭМЖЛЭГЭЭР.  Бид ямар ч зүйлд нэгдэж чадвал ялж болдог юм байна, ҮНЭН илэрдэг юм байна шүү. Эхнээсээ намайг дэмжиж, урам өгсөн, зоригжуулсан, чи ганцаараа биш шүү гэж урагшлах итгэл хайрлаж байсан, хайрлаж байгаа ТА БҮХЭНДЭЭ БАЯРЛАЛАА. Худал хуурмаг зүйлтэй эвлэрээд сууж чадахгүй байгааг минь хараад хүсэл, санааг минь ойлгож бүх зүйлд минь хамт байж тэмцсэн ЭЭЖДЭЭ онцгойлон БАЯРЛАЛАА. Тун удахгүй хавтаст хэрэгтэйгээ танилцсаныхаа дараа та бүхэнд дэлгэрэнгүй мэдээлэл хүргэх болно оо. БИЕ НЬ ЭНЭ ОРЧЛОНД БАЙХГҮЙ БОЛЛОО Ч ҮР НЬ ҮЛДСЭН ХОРВООД НЭР НЬ ЦЭВЭР ЯВАГ ЭЭ" гэж сэтгэгдлээ хуваалцав. 

Тэр чадлаа. Түүний тэмцэл үр дүнгээ өгсөн гэхээсээ илүүтэй хууль, хяналтынхан үнэнд гүйцэгдлээ. Энэхүү үйл явдлаас хуулийнхан хэргийг хэрэг биш болгодог, нэг талд үйлчилдэг байж болзошгүй дүр зургийг олж харлаа. Эс бөгөөс хөгжлийн бэрхшээлтэй Б.Болороо бүсгүйг бүтэн жил бие, сэтгэлийн зовлонд унагаж, нөхрийг нь архи ууснаас болж лифтний хонгил руу унаж амиа алдсан гэх шүүх эмнэлгийн анхны дүгнэлт, хэргийн мөрдөн шалгах ажиллагаа үр дүнгүй үйл явцын цаад шалтгааныг хэрхэн тайлбарлах вэ. Энд хэн хариулж, хэн хариуцлага хүлээх вэ!!!